सोलापूर : शहराची 2033 ची लोकसंख्या विचारात घेऊन उजनी ते सोलापूर दुहेरी पाइपलाइनच्या कामाला बुधवारी (ता. 9) प्रत्यक्षात सुरवात झाली. 110 एमएलडी (दशलक्ष लिटर) पाणी सोलापूरकरांना वाढीव मिळणार आहे. त्यासाठी 449.64 कोटींचा खर्च अपेक्षित असून त्यापैकी 250 कोटी एनटीपीसीतर्फे मिळणार आहेत, तर 200 कोटींचा खर्च स्मार्ट सिटीतून केला जाणार आहे. या कामासाठी हैदराबाद येथील पोचमपाड कन्स्ट्रक्शन कंपनीची निवड केली असून, महाराष्ट्र जीवन प्राधिकरणास या कामाच्या देखरेखीसाठी व्यवस्थापन सल्लागार म्हणून नियुक्त करण्यात आले आहे. काम पूर्ण झाल्यानंतर (फेब्रुवारी 2022) शहरवासीयांना नियमित पाणी मिळेल, असा विश्वास अधिकाऱ्यांनी व्यक्त केला.
जमिनीखालून पाइपलाइन टाकण्याच्या अनुषंगाने जिल्हाधिकारी व भूमी व अभिलेखाच्या अधीक्षकांमार्फत सीमांकन व मोजणीचे काम हाती घेण्यात आले आहे. उजनी जलाशय येथे पंपिंग स्टेशनसाठी 0.25 हेक्टर जागा मिळावी म्हणून महापालिकेने जलसंपदा विभागाला पत्र पाठविले आहे. त्या ठिकाणी जॅकवेल बांधणे, पंपिंग स्टेशन व पंपिंग मशिनरी, रायझिंग मेन ग्रॅव्हिटी मेन अशी कामे होणार आहेत. उजनी ते वरवडेदरम्यान (28.5 किलोमीटर) दाबनलिका तर वरवडे ते सोरेगावपर्यंत (81.5 किलोमीटर) उतारनलिका टाकली जाणार आहे. आजपासून या कामासाठी पाइप आणले जात असून पहिल्याच दिवशी 15 किलोमीटरपर्यंत पाइप टाकण्याचे काम युद्धपातळीवर सुरू झाले आहे.
थाटात पार पडले उद्घाटन
सोलापूर ते उजनी दुहेरी पाइपलाइनच्या कामाचा प्रारंभ बुधवारी (ता. 9) पार पडला. या वेळी खासदार जयसिद्धेश्वर महास्वामी, महापौर श्रीकांचना यन्नम, उपमहापौर राजेश काळे, महापालिका आयुक्त पी. शिवशंकर, स्मार्ट सिटीचे मुख्य कार्यकारी अधिकारी त्र्यंबक ढेंगळे-पाटील, सभागृहनेता श्रीनिवास करली, नगरसेवक आनंद चंदनशिवे, चेतन नरोटे, रियाज खरादी, परिवहन सभापती जय साळुंखे, डाळिंब संशोधन केंद्राचे प्रशासकीय अधिकारी श्री. रॉय, संचालिका ज्योत्स्ना शर्मा, स्मार्ट सिटीचे मुख्य तांत्रिक अधिकारी संजय धनशेट्टी, महाराष्ट्र जीवन प्राधिकरणाचे कार्यकारी अभियंता श्री. भांडेकर, पोचमपाड कंपनीचे श्रीनिवास राव आदींच्या उपस्थितीत कामाचे उद्घाटन झाले.
संपादन : श्रीनिवास दुध्याल
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates, मराठी ताज्या बातम्या, मराठी ब्रेकिंग न्यूज, मराठी ताज्या घडामोडी. And Live taja batmya on Esakal Mobile App. Download the Esakal Marathi news Channel app for Android and IOS.
