सीमाभागात गैरसोयच ; बससेवा, बेळगाव-मिरज पॅसेंजरची मागणी

उगार खुर्द : कर्नाटक-महाराष्ट्राच्या (Karnatka, Maharastra)दरम्यान गेल्या सुमारे दीड वर्षापासून थेट बससेवा सुरू न झाल्याने दोन्ही राज्यात विविध भागात राहणाऱ्या सीमाभागातील नागरिकांची गैरसोय होत आहे. दिवाळी तोंडावर आली असून दोन्ही राज्यांच्या दरम्यानची बससेवा सुरू व्हावी. तसेच बेळगाव-मिरज (Belguam, Miraj) दरम्यान पॅसेंजर रेल्वेगाड्या सुरू कराव्यात, अशी मागणी होत आहे.

कोरोनाचा प्रभाव वाढल्याने दीड वर्षापासून कर्नाटक-महाराष्ट्र बस व बेळगाव-मिरज पॅसेंजर रेल्वे बंद आहे. परिणामी प्रवाशांना ठिकठिकाणी जाणे अशक्य झाले आहे. अलीकडे कर्नाटक-महाराष्ट्रातील मंदिरे खुली झाली आहेत. साखर कारखान्यांचे गळीत हंगाम व संस्था सुरू झाल्या आहेत.

कर्नाटक-महाराष्ट्राच्या विविध भागात रूग्णांवर उपचार, मंगल कार्ये, बाजार, धार्मिक कार्यक्रमासाठी नेहमी ये-जा सुरू असते. मात्र बेळगाव-मिरज पॅसेंजर रेल्वे बंद आहे. तसेच विजापूर, अथणी, जमखंडी, चिक्कोडी भागाकडून मिरज, कोल्हापूर, पुण्याकडे जाणाऱया-येणाऱय़ा बस कागवाड सीमेपर्यंत आहेत. तेथून बसमधून महाराष्ट्रात जावे लागते. तर महाराष्ट्रातून कर्नाटकात येताना कागवाड येथे बस बदलावी लागते. त्यामुळे वेळ व पैशाचा अपव्यय होत आहे. यासाठी दोन्ही राज्यांनी बससेवा व पॅसेंजर रेल्वे सुरू करण्याची मागणी होत आहे.

कागवाड येथे बस बदलाव्या लागतात. त्यामुळे प्रवासाला वेळ लागून गैरसोय होते. यासाठी कर्नाटक-महाराष्ट्राच्या दरम्यान थेट बससेवा सुरू करावी.

-माधुरी माळी, ग्रा. पं. सदस्या, मंगसुळी

बेळगाव-मिरज दरम्यान पॅसेंजर रेल्वे बंद असल्याने व्यापारी, ग्रामस्थ, कामगारांची गैरसोय व प्रवास खर्चिक होत आहे. त्यासाठी या मार्गावर पूर्ववत पॅसेंजर रेल्वे सुरू कराव्यात.

-नंदिनी फराकटे, माजी उपनगराध्यक्षा, उगार खुर्द