बहिणीशी प्रेमविवाह केल्याच्या रागातून तरुणाचा धारदार शस्त्राने निर्घृण खून; मेहुण्याला घेतलं ताब्यात

तासगाव : सावळज (ता. तासगाव) येथे बहिणीशी प्रेमविवाह (love Marriage) केल्याच्या रागातून तरुणाचा डोक्यात धारदार शस्त्राने वार करून निर्घृण खून करण्यात आल्याची घटना बुधवारी (ता. ७) रात्री साडेनऊ वाजण्याच्या सुमारास घडली. भारत ऊर्फ संतोष संजय पाटील (वय २९) असे खून झालेल्या तरुणाचे नाव आहे. या घटनेने सावळज (Savlaj Sangli) परिसरात खळबळ उडाली.

दरम्यान, तासगाव पोलिसांनी (Tasgaon Police) संशयावरून रात्री उशिरा संतोषचा मेहुणा ओंकार पाटीलला इचलकरंजी येथून ताब्यात घेतले आहे. याबाबत तासगाव पोलिसांतून मिळालेली माहिती अशी की, सावळज (ता. तासगाव) येथील ट्रॅक्टर चालक संतोष पाटील याने २०२१ मध्ये भावकीतीलच ओंकार शिवाजी पाटील याच्या बहिणीशी प्रेमविवाह केला. त्याचा राग मनात धरून ओंकार संतोषला नेहमी शिवीगाळ करीत असे. अनेकदा ‘तुला जिवंत सोडणार नाही’ अशी धमकीही देत असे.

काल रात्री साडेनऊ वाजण्याच्या सुमारास वस्तीपासून काही अंतरावर संजय पवार यांच्या शेततळ्याजवळ संतोषचा डोक्यात मागून धारदार शस्त्राने वार करून खून झाला. खून ओंकार शिवाजी पाटील याने केल्याचा संशय असल्याची फिर्याद मृत संतोषची आई वैशाली संजय पाटील यांनी पोलिसांत दिली. खुनाच्या घटनेची माहिती मिळताच उपविभागीय पोलिस अधिकारी सचिन थोरबोले, पोलिस निरीक्षक सोमनाथ वाघ यांनी पोलिस पथकासह घटनास्थळी धाव घेतली.

आज दिवसभर पोलिस अधिकारी व पथक सावळज येथे उशिरापर्यंत तळ ठोकून होते. मृत संतोष पाटील ट्रॅक्टरवर चालक म्हणून काम करीत असे. ऑगस्ट २०२१ मध्ये त्याने प्रेमविवाह केला. दाम्पत्याला एक मुलगाही आहे. काल सायंकाळी कामावरून येऊन साडेसहा वाजण्याच्या सुमारास घरी रात्री ९.३० वाजेपर्यंत येतो, असे सांगून मोटारसायकलवरून गेला. घटनास्थळी त्याची मोटारसायकल पडली होती. संशयित ओंकार सध्या सासूरवाडी इचलकरंजी येथे राहत आहे. त्याला इचलकरंजी येथून ताब्यात घेण्यात आले. सहाय्‍यक पोलिस निरीक्षक भांडवलकर अधिक तपास करीत आहेत.