युवकांच्या प्रयत्नातून विरमाडे-कळंबे रस्त्याची दुरुस्ती 

सायगाव (जि. सातारा) : आज गावोगावी अनेक रस्त्यांची शासनाच्या निधीअभावी परवड झाली आहे. मात्र, या पार्श्‍वभमीवर कळंबे (ता. वाई) येथील युवकांनी शासनाच्या निधीची वाट न पाहता श्रमदानातून व वर्गणी काढून रस्ता तयार करून समाजापुढे एक आगळावेगळा आदर्श घालून दिला आहे.

हेही वाचा - पाटण तालुक्यात दारुबंदीसाठी महिलांचा एल्गार 

विरमाडे ते कळंबे हा रस्ता गेली कित्येक वर्षे खड्ड्यांमुळे धोकादायक बनला होता. त्यातील काही रस्ता शासन निधीतून तयार झाला होता. मात्र, निकृष्ट कामामुळे त्याची लगेच दुर्दशा झाल्याने ग्रामस्थांना मोठमोठ्या खड्ड्यांमधून प्रवास करावा लागत होता. येथून पुढे सर्जापूर, कुडाळकडे जाण्यासाठी जवळचा मार्ग असल्याने वाहतूकदेखील मोठ्या प्रमाणात सुरू असते. अखेर गावातील सर्व युवकांनी एकत्र येत शासकीय निधीची वाट न पाहता जेवढी जमेल तेवढी रक्कम गोळा करून प्रत्यक्षात रस्त्यावरील खड्डे भरण्याचे काम हाती घेतले.

यासाठी सिमेंट, खडी, वाळू आदी साहित्य गोळा करून स्वतःच कामाला सुरवात केली. सर्वप्रथम कळंबे व सर्जापूर गावाला जोडणाऱ्या पुलावर पडलेला मोठमोठे खड्डे भरून घेत रस्ता चकाचक केला. या गावचे सैन्यदलात असणारे जवान विजय वाघ यांचे मोलाचे मार्गदर्शन या तरुण वर्गाला लाभले.

हेही वाचा - शिवेंद्रसिंहराजेंचा टोल नाका बंदचा निर्धार

वाघ यांनी गावातील युवकांचे प्रबोधन करून राजकारण, गट-तट बाजूला ठेवून गावासाठी काम करण्यासाठी प्रवृत्त केले व अनेक कामे हाती घेऊन पूर्ण केली. युवक वर्ग दिवसभर आपापले उद्योग करून रोज रात्रीच्या वेळी हे एकत्र येत श्रमदान करत ही कामे पूर्ण करत आहेत. त्यात गावातील ग्रामस्थ, महिलादेखील आपापल्या परिने शक्‍य होईल तेवढी मदत करत आहेत, तर त्यांच्या या कामाचे परिसरातून कौतुक होत आहे. 

आमच्या गावचे कारगिल युद्धात हुतात्मा झालेले जवान शशिकांत शिवथरे यांचा आदर्श डोळ्यापुढे ठेवून आम्ही कामाला सुरवात केली आहे. आम्ही सरकारी निधीची वाट न पाहता ग्रामस्थ, महिला, युवकाने लोकवर्गणीतून विकासकामे करण्याचा निर्धार केला आहे. 

कॅप्टन विजय वाघ, सामाजिक कार्यकर्ते.