पिंपरी : प्लॅस्टिकबंदी आदेशाचे उल्लंघन करणाऱ्यांवर महापालिका प्रशासनाने पुन्हा एकदा कारवाई सुरू केली. रविवारी (ता. 6) महापालिकेच्या पथकांनी शहरातील मोशी कृषी उत्पन्न बाजारात विविध चाळीस भाजी विक्रेत्यांवर प्लॅस्टिक पिशव्यांचा वापर केल्याबद्दल 25 हजार रुपयांचा दंड ठोठावला आहे. सरकारच्या आदेशानुसार प्लॅस्टिक पिशव्यांच्या वापरावर बंदी असतानाही शहरात काही व्यापारी, व्यावसायिक प्लॅस्टिक पिशव्यांचा वापर करीत आहेत.
महापालिकेचे आरोग्य वैद्यकीय अधिकारी डॉ. अनिल रॉय यांच्या सूचनेनुसार आरोग्य विभागाच्या पथकांमार्फत धडक मोहीम हाती घेतली आहे. ही कारवाई महापालिकेच्या 'क' क्षेत्रीय कार्यालयाच्या आरोग्य विभाग व भोसरी एमआयडीसी पोलिस ठाण्याच्यावतीने करण्यात आली. या बाजारातील व्यावसायिकांकडून साडेबारा किलो प्लॅस्टिक जप्त करून 25 हजार रुपयांचा दंड वसूल केला. यावेळी आरोग्य वैद्यकीय अधिकारी डॉ. रॉय, सहायक आयुक्त अण्णा बोदडे, वरिष्ठ पोलिस निरीक्षक शिवाजी गवारे यांच्या मार्गदर्शनाखाली सहायक आरोग्य अधिकारी बी. बी. कांबळे, विजय दवाळे, पोलिस निरीक्षक गिरणार, भांडे, आरोग्य निरीक्षक अंकुश झीटे, वैभव कांचनगौडा, आरोग्य मुकादम रवींद्र गायकवाड यांच्यासह कर्मचारी उपस्थित होते.
दरम्यान, रविवारी सकाळी या पथकांनी प्लॅस्टिक प्रतिबंधात्मक केलेल्या कारवाईत बाजार समिती मोशी मार्केटमधील चाळीस व्यावसायिकांची तपासणी केली. पाच व्यावसायिकांकडून बंदी असलेल्या प्लॅस्टिक वापराबाबत सुमारे 25 हजार प्रशासकीय शुल्क वसूल करून सुमारे साडेबारा किलो प्लॅस्टिक जप्त करण्यात आले. या बाजारात या पथकाने प्लॅस्टिक बंदीसंदर्भात मोहीम राबवून व्यापारी व दुकानदारांमध्ये जागृतीही केली. प्लॅस्टिकचा वापर करणे हा गुन्हा असून, त्याचा वापर रोखण्यासाठी महापालिकेच्या आरोग्य पथकांनी ही मोहीम अधिक तीव्र करण्याचे निर्देश डॉ. रॉय यांनी दिले आहेत. महाराष्ट्र सरकारने जारी केलेल्या प्लॅस्टिक व थर्माकोल प्रतिबंधक नियम 2018 नुसार प्लॅस्टिक व थर्माकोल, इत्यादींपासून बनविलेल्या अविघटनशील वस्तूंचे उत्पादन, वापर, विक्री व वाहतुकीस प्रतिबंध केला आहे. महापालिका क्षेत्रात प्लॅस्टिकबंदी आदेशाचे काटेकोरपणे पालन करण्यात येत आहे. प्लॅस्टिक व थर्माकोल प्रतिबंधक नियमानुसार दंडात्मक कारवाई तसेच वर्षाचा कारावास होऊ शकतो.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.