Sant Tukaram Maharaj : संत तुकाराम महाराजांच्या पालखीचे आज प्रस्थान

देहू - आषाढी वारीसाठी संत श्री तुकाराम महाराज पालखी सोहळा शनिवारी (ता. १०) दुपारी दोन वाजता देहूतून पंढरपूरकडे प्रस्थान ठेवणार आहे. या पार्श्वभूमीवर राज्याच्या कानाकोपऱ्यातून शुक्रवारी देहूत दिंड्यांचे आगमन झाले. तसेच विविध गावांतील वारकरी आणि भाविक वाहनांमधून दाखल झाले. इंद्रायणी नदीचा काठ भाविकांच्या गर्दीने फुलून गेला. मंदिर परिसरात टाळ-मृदंग आणि तुकाराम तुकाराम नामघोषाने भक्तिमय वातावरण निर्माण झाले.

संत तुकाराम महाराज देऊळवाड्यात वारकऱ्यांनी दर्शनासाठी गर्दी केली. दर्शनबारीतून भाविकांना देऊळवाड्यात दर्शनासाठी प्रवेश देण्यात येत होता. देहू नगरपंचायत प्रशासनाने सोहळ्यातील भाविकांना विविध सोयी-सुविधा मिळाव्यात म्हणून तयारी पूर्ण केली आहे. नगरपंचायत प्रशासनाने कार्यालयात नियंत्रण कक्ष सुरू केला.

सोहळ्यातील वारकऱ्यांच्या सुरक्षेसाठी चोख पोलिस बंदोबस्त तैनात करण्यात आला आहे. १५ पोलिस निरीक्षक, ६० सहाय्यक पोलिस निरीक्षक, २७५ पुरुष पोलिस, १५० महिला पोलिस, २०० होमगार्ड, एसआरपीची एक प्लॅटून आणि स्ट्राकिंग फोर्सची एक तुकडी असा पोलिस बंदोबस्त ठेवण्यात आला आहे. तसेच आरोग्य, पाणीपुरवठा, वीजपुरवठा विभागानेही ठिकठिकाणी मदत केंद्र सुरू केले आहेत.

गावात विविध ठिकाणी अन्नदान

संत तुकाराम महाराज अन्नदान मंडळाच्या वतीने गेल्या दोन दिवसांपासून भाविकांसाठी अन्नदानाची सोय केली आहे. तसेच गाथा मंदिर परिसरात सुदर्शन मित्र मंडळाच्या वतीनेही दहा हजार वारकऱ्यांसाठी अन्नदानाची सोय केली आहे. तसेच माळवाडी, विठ्ठलवाडी ग्रामस्थांच्या वतीने वारकरी आणि दिंड्यांसाठी भोजनाची व्यवस्था केली आहे.