पिंपरी-चिंचवडमध्ये जोरदार पाऊस, नागरिकांची तारांबळ

पिंपरी : चार दिवसांच्या विश्रांतीनंतर पावसाने शुक्रवारी (ता. 28) सायंकाळी शहर परिसरात जोरदार हजेरी लावली. त्यामुळे सकाळपासून दुपारपर्यंत ऊन असल्याने रेनकोट व छत्रीशिवाय घराबाहेर पडलेल्यांची तारांबळ उडाली. 

ऑगस्टच्या दुसऱ्या आठवड्यापासून शहरात पाऊस सुरू होता. कधी ऊन-सावली तर कधी ऊन-पाऊस असा खेड रंगलेला असायचा. त्यामुळे पुणे-मुंबई, मुंबई-बंगळूर (देहूरोड-कात्रज बाह्यवळण), पुणे-नाशिक महामार्गाच्या सेवा रस्त्यांसह अंतर्गत रस्त्यांवरही खड्डे पडले होते. अनेक ठिकाणी चिखल साचला होता. सखल भागात पाणी साचले होते. यंदाच्या गणेशोत्सवात लाडक्‍या गणरायाचे स्वागतही पावसातच करावे लागले होते. रविवारपर्यंत (ता. 23) पाऊस सुरूच होता. 

एकाच व्यासपीठावर राजकीय विरोधकांची मांदियाळी, कुठे घडला हा चमत्कार? वाचा

पुणे, पिंपरी-चिंचवडकरांनो! आता मास्क नसल्यास एक हजाराचा दंड 

सोमवारपासून (ता. 24) पावसाने विश्रांती घेतली. गेल्या दोन दिवसांपासून तर कडक ऊन पडत होते. शुक्रवारी (ता. 28) सकाळपासूनच ऊन पडले होते. मात्र, दुपारी तीननंतर ढग दाटून आले आणि पाचच्या सुमारास जोरदार पावसाला सुरुवात झाली. यामुळे महामार्गाच्या कडेची झाडे, ग्रेडसेपरेटर, उड्डाणपुलांचा दुचाकीस्वारांना आसरा घ्यावा लागला. तर कामानिमित्त घराबाहेर पडलेल्या काही पादचाऱ्यांनी दुकानांचा आसरा घेतला. साधारणतः एक तास पावसाच्या जोरदार सरी कोसळल्या. त्यानंतर ढगाळ वातावरण कायम होते. 

पावसात बाप्पांचे विसर्जन 

गणेशोत्सवाचा शुक्रवारी सातवा दिवस होता. त्यामुळे सातव्या दिवसांच्या गणरायाचे अनेक भाविकांनी विसर्जन केले. विशेष म्हणजे जुनी सांगवी, नवी सांगवी, पिंपळे गुरव येथील सार्वजनिक व घरगुती गणेश मूर्ती सातव्या दिवशी विसर्जन करण्याची परंपरा आहे. आज पाऊस आल्याने गणेशभक्तांना भिजतच बाप्पांचे विसर्जन करावे लागले.