Hinjewadi News : आयटीत स्वातंत्र्यदिनी वेगवेगळ्या अपघातात दोघा तरुणांचा मृत्यू

हिंजवडी - स्वातंत्र्यदिनी आयटी परिसरात दोन घटनांमध्ये दोघा तरुणांचा अपघाती मृत्यू झाला. रिहे, भेगडेवाडी (मुळशी) बंधाऱ्यात पोहायला गेलेला हिंजवडीतील केपीआयटी कंपनीत संगणक अभियंता असलेला हर्षित पोटलूरी (वय २७) याचा बुडून मृत्यू झाला.

तर हिंजवडी येथे विजवाहक तारांचा शॉक लागून हंगामी वायरमन असलेला जनक कामगुंडा (वय २२) याचा मृत्यू झाला. शोधमोहीम राबवल्यानंतर बुडालेल्या हर्षितचा मृतदेह सापडला. हर्षित पोटलूरी मुळचा आंध्र प्रदेशचा रहिवासी असून सध्या हिंजवडीत राहत होता.

हिंजवडीमध्ये विजवाहक तारांच्या धक्क्याने वायरमनचा मृत्यू

आयटी नगरी माण-हिंजवडीमध्ये हंगामी वायरमन मदतनीस म्हणून काम करणारा जनक कामगुंडा (वय-२२, रा. सध्या माण, मूळ : लातूर) हा पांडवनगर, हिंजवडी येथे विद्युतवाहक तारांपाशी बिघाड दुरुस्तीचे काम करत होता. त्याला विजेचा जोरदार धक्का लागून तो खाली पडला. दवाखान्यात पोहोचण्याआधीच त्याचा मृत्यू झाला.

जनक हा त्याचा दाजी तानाजी हनुमंत काकनाळे यांच्याकडे राहत होता. काकनाळे हे महावितरणमध्ये वायरमन म्हणून काम करतात. विशेष म्हणजे एक महिन्यापूर्वीच काकनाळे यांचा बोडकेवाडी फाट्यावर काम करताना विजेचा धक्का लागून अपघात झाला होता. त्यात ते खांबावरून खाली पडल्याने त्यांना मोठी दुखापत होऊन त्यांच्यावर शस्त्रक्रिया झाली होती. त्यानंतर मेव्हण्याच्या बाबतीत ही घटना झाल्याने माण गावात हळहळ व्यक्त केली जात आहे.

इतरांचे जीवन प्रकाशमान करणाऱ्या वायरमनच्या आयुष्यात काळोख

महावितरण विभागात असलेला अंतर्गत समन्वयाचा अभाव, सुरक्षिततेची अपुरी साधन सामुग्री व असंख्य त्रुटींमुळे वीजवाहक तारांचा धक्का लागून वायरमनचा मृत्यू होण्याच्या किंवा तो गंभीर जखमी होऊन अधू होण्याच्या घटनात सातत्याने वाढ होत आहे. आयटी पार्क हिंजवडीच्या पट्ट्यात आशा घटना वारंवार घडत आहेत.

मात्र, सध्या महावितरणमध्ये तात्पुरत्या स्वरूपात किंवा काम कंत्राटी पद्धतीने काम करणाऱ्या कामगारांची संख्या मोठी आहे. अशी एखादी दुर्घटना अथवा अपघात झाल्यास महावितरण प्रशासन चक्क जबाबदारी झटकून मोकळे होते. अधिकारी याकडे गांभीर्याने पाहत नाहीत. त्यामुळे इतरांचे जीवन प्रकाशमान करणारे वायरमनच गडद काळोख पचवत काम करीत असल्याचे वास्तव आहे.