रावेतमध्ये भरधाव ट्रकने कामगारांना उडवले; एकाचा मृत्यू, चौघे जखमी

पिंपरी - रस्त्यावर सफेद पट्ट्या मारण्याच्या काम करणाऱ्या पाच कामगारांना भरधाव ट्रकने उडवले. यामध्ये एका कामगाराचा मृत्यू झाला असून चौघे जखमी आहेत. ही घटना देहूरोड-कात्रज बाह्यवळण मार्गावर रावेत येथे घडली.

सादिक हुसेन खान (वय ३५, रा. राजस्थान) असे या अपघातात मृत्यू झालेल्या कामगाराचे नाव आहे. तर भोला कुमार, अनिल कुमार, प्रल्हाद यादव (सर्व रा. राजस्थान), संदीप देशमुख (रा. नांदेड) हे जखमी आहेत. हे सर्व जण एका कंपनीत कंत्राटी कामगार असून ते सोमवारी (ता. ३०) पहाटे साडे तीनच्या सुमारास देहूरोड-कात्रज बाह्यवळण मार्गावर पट्ट्या मारण्याचे काम करीत होते. देशमुख हे सुपरवायजर आहेत.

दरम्यान, पुण्याहून मुंबईच्या दिशेने जाणाऱ्या मार्गावर काम सुरु असताना भरधाव ट्रकने त्यांना जोरात धडक दिली. यामध्ये सादिक यांचा मृत्यू झाला. तर, चौघे जखमी झाले. यातील देशमुख हे गंभीर जखमी आहेत. जखमींना तातडीने उपचारासाठी रुग्णालयात दाखल करण्यात आले. अपघातानंतर ट्रकचालक घटनास्थळावरुन पसार झाला. घटनेची माहिती मिळताच पोलिसांनी घटनास्थळी धाव घेतली. अधिक तपास सुरु आहे.