बापानेच केला मुलाचा खून

पिंपरी - सततच्या वादातून बापानेच मुलाचा खून केल्याची घटना मोशी येथे घडली. खुनानंतर बापानेच पोलिसांना माहिती दिली. पोलिसांनी त्याला ताब्यात घेतले आहे.

युवराज अशोक साळवे (वय २२, रा. मोशी) असे खून झालेल्या मुलाचे नाव आहे. युवराज हा आई-वडील व मोठ्या भावासह येथे राहत होता. काही दिवसांपासून किरकोळ कारणावरूनही युवराज त्याच्या कुटुंबियांना मारहाण करायचा. गुरुवारी (ता. २३ ) रात्रीही युवराज व त्याच्या कुटुंबियांत वाद झाला. युवराजने आई व भावाला घराबाहेर काढले.

त्यानंतर युवराज व त्याच्या वडिलांमध्ये हाणामारी झाली. यामध्ये वडिल अशोक याने युवराजला लोखंडी पाईपने बेदम मारहाण केली. यामध्ये त्याचा मृत्यू झाला. या घटनेची माहिती युवराजच्या बापानेच भोसरी एमआयडीसी पोलिसांना दिली. त्यानंतर पोलिसांनी अशोकला ताब्यात घेतले. एमआयडीसी भोसरी पोलिस अधिक तपास करीत आहेत.