वकील असल्याचे खोटे सांगून बनावट कागदपत्रे बनवून केली तेरा लाखांची फसवणूक

पिंपरी - वकील (Lawyer) असल्याचे खोटे सांगून एका व्यक्तीच्या फ्लॅटचे बनावट रेरा व पीएमआरडीए नोंदणीची कागदपत्रे Bogus Documents) तयार केली. त्याद्वारे फ्लॅटचे रजिस्ट्रेशन करून एकाची तेरा लाख आठ हजारांची फसवणूक (Cheating) केली.

प्रसन्न शिरुडकर (वय ४१), शर्वरी प्रसन्न शिरुडकर (वय ४०, दोघेही ऍड्रसेस सोसायटी, रा. मोशी) अशी गुन्हा दाखल झालेल्यांची नावे आहेत. याप्रकरणी अमित दत्तात्रय घुले (रा. मांजरी बुद्रुक, ता. हवेली) यांनी भोसरी पोलिस ठाण्यात फिर्याद दिली आहे. फिर्यादी हे त्यांच्या ओळखीचे ऍड. पठाण यांना भेटण्यासाठी गेले असता तिथे त्यांची आरोपींसोबत ओळख झाली. आरोपींनी फिर्यादी यांच्याशी ओळख वाढवून तुमचे दस्त करून देतो, असे सांगत फिर्यादीचा विश्वास संपादन केला.

आरोपीने हे वकील नसतानाही त्यांनी फिर्यादी यांना आपण वकील असल्याचे सांगितले. त्यानंतर फिर्यादी यांचे मांजरी बुद्रुक येथील शारदा कॉम्प्लेक्स व शारदा सुमन आर्केड या बिल्डिंग मधील १३ फ्लॅटचे रजिस्ट्रेशन करून देतो असे सांगितले. त्यासाठी फिर्यादीकडून सातबारा उतारा, आठ (अ) उतारा तसेच फ्लॅट विक्रीचे मूळ दस्त घेतले. सात फ्लॅटचे १८ व १९ मे या दोन दिवसात दुय्यम निबंधक कार्यालय, हवेली क्रमांक २५, दापोडी येथे बनावट रेरा व पीएमआरडीए नोंदणीचे कागदपत्र बनवून त्याचा वापर करून रजिस्ट्रेशन केले. यामध्ये फिर्यादी घुले यांची तेरा लाख आठ हजारांची फसवणूक केली. भोसरी पोलिस अधिक तपास करीत आहेत.