‘आरटीई’साठी पाल्यांची आजपासून नोंदणी

पिंपरी, ता. २२ : ‘आरटीई’अंतर्गत प्रवेश प्रक्रिया तीन टप्प्यात होत असून, पहिल्या टप्प्यामध्ये शाळांची नोंदणी प्रक्रिया पूर्ण झाली आहे. पाल्यांची नोंदणी गुरुवारी (ता. २३) दुपारी तीन वाजल्यापासून सुरू होणार आहे.
आरटीईअंतर्गत शहरातील १८२ शाळांनी नोंदणी केली आहे. गेल्यावर्षीच्या तुलनेत यावर्षी काही शाळांनी याकडे पाठ फिरवली आहे. त्यामुळे, यावर्षी प्रवेश मिळविण्यासाठी पालकांचा कस लागणार आहे.

अर्ज कसा भरावा...
सर्वप्रथम पालकाने अर्जाची नोंदणी करावी मग आपल्याला अर्जाचा क्रमांक आणि पासवर्ड मिळेल. मोबाईलवरील तो पासवर्ड आणि अर्ज क्रमांक टाकून लॉगिन करावे. बालकाची आणि पालकांची सर्व माहिती अचूक व खरी भरावी. परिसरातील १ किंवा ३ किलोमीटरच्या आत शाळा दिसत असल्यास, त्या शाळेला टिक करावे. आपल्या पाल्याला ज्या वर्गामध्ये प्रवेश घ्यायचा आहे, तो वर्ग निवडावा. शाळा जवळपास असेल तर शाळेची यादी तुम्हाला दिसेल, त्या शाळेच्या यादीतील शाळेवर तुम्हाला टिक करायचे आहे.