वैष्णोमाता शाळेतील समस्या सुटेनात

पिंपरी, ता. १६ : महापालिकेच्या इंद्रायणीनगर येथील वैष्णोमाता प्राथमिक विद्यालयातील वाढत्या गैरसोयी आणि दुरवस्थेबाबत पालकांनी गंभीर आक्षेप नोंदवत प्रशासनाकडे तातडीच्या कार्यवाहीची मागणी केली. अधिकारी समस्या सोडवत नसल्याची पालकांनी तक्रार केली आहे.
शाळेतील खेळण्यांची दुरवस्था झाली असून घसरगुंडी मोडकळीस आली आहे. खेळाच्या परिसरात टाकलेली रेती, माती वर्गखोल्यांमध्ये उडून विद्यार्थ्यांना त्रास होत आहे. शाळेतील पाणीपुरवठ्याचे नळ तुटलेले, सिंटेक्स टाक्यांचे जोड तुटलेले असल्याने स्वच्छतागृहाचा वापर बंद आहे. सुटीनंतर शाळेची इमारत इतर कामांसाठी वापरली जात असल्याबाबतही पालकांनी नाराजी व्यक्त केली.
सहा महिन्यांपूर्वी अनधिकृतरीत्या बांधण्यात आलेली संगणक प्रयोगशाळेची खोली अद्याप अपूर्ण आहे. वीजपुरवठा, रंगकाम आणि फिर्निशिंगचे काम बाकी असल्याचे निदर्शनास आले आहे. शाळेच्या आवारालगत उच्चदाब वीजवाहक तारा आहेत. त्यामुळे अपघाताचा धोका आहे. नाल्याची दुर्गंधी वाढली आहे. त्यामुळे विद्यार्थ्यांचे आरोग्य धोक्यात आल्याचेही पालकांनी सांगितले.
संबंधित कनिष्ठ, उपअभियंता आणि कार्यकारी अभियंत्यांना दुरुस्तीबाबत मागणी केली. त्यांनी ही कामे करण्याची तत्परता दाखविलेली नाही. महापालिकेने विद्यार्थ्यांच्या सुरक्षेचा आणि हिताचा विचार करून तातडीने दुरुस्ती करावी, अशी मागणी पालक अॅड. प्रभाकर तावरे पाटील यांनी केली आहे.