केंद्राच्या अंदाजपत्रकात उद्योजकांच्या मागण्यांचा समावेश करा

पिंपरी, ता. ३१ ः केंद्र सरकारच्या चालू आर्थिक वर्षाच्या अंदाजपत्रकात उद्योजकांच्या मागण्यांचा समावेश करावा, अशी मागणी पिंपरी चिंचवड शहरातील फेडरेशन ऑफ एम.एस.एम.ई. या उद्योजक संघटनेकडून करण्यात आली आहे. यासंदर्भात दिलेल्या निवेदनात फेडरेशनचे अध्यक्ष डॉ. गोविंद पानसरे यांनी विविध मागण्या केल्या आहेत. त्यामध्ये एम.एस.एम.ईची वाढ व त्यांना प्रोत्साहन देण्यासाठी कर्ज वितरण पद्धतीत सुलभता आणावी. लघुउद्योगाच्या संरक्षणासाठी डिजिटल प्लॅटफॉर्म प्रक्रिया सुलभ करावी. अमेरिकेच्या वाढीव शुल्काने प्रभावित उद्योगांना प्रोत्साहनपर योजना सुरू करावी. विनातारण विना जामीन पत पुरवठ्याची मर्यादा पाच कोटींवरून दहा कोटी करा. निर्यातीत सुलभता आणण्यासाठी डिजिटल प्रक्रियेत एआयचा वापर करावा. जागतिक बाजारपेठेत टिकून राहण्याकरिता उद्योगाला मार्केटिंगसाठी मदत करावी, अशा मागण्यांचा केंद्राच्या अर्थसंकल्पात समावेश करावा, अशी मागणी पानसरे यांनी निवेदनाद्वारे केली आहे.
---