हिंजवडीत दुचाकी अपघातात दोघांचा मृत्यू

पिंपरी, ता. २२ : सिमेंट कठड्याला दुचाकी धडकून झालेल्या अपघातात चालकासह दोघांचा मृत्यू झाला. ही घटना हिंजवडी फेज-तीन येथील डीएलएफ सर्कलजवळील मेट्रो स्थानकाजवळ शनिवारी घडली.
ऋषिकेश सहदेव पोटदुखे (वय २६, रा. कासार एक्सप्रिया सोसायटी, वाकड, मूळ-अमरावती) आणि अक्षय राजेंद्र कावरे (वय २३, रा. कासार एक्सप्रिया सोसायटी, वाकड, मूळ- उंब्री, जि. अकोला) अशी या अपघातात मृत्यू झालेल्यांची नावे आहेत. हे दोघेही नोकरीनिमित्त शहरात आले होते. तसेच ते सोबत राहत होते. काही कामानिमित्त ते घराबाहेर पडले. ऋषिकेश दुचाकी चालवत होता. तर, अक्षय पाठीमागे बसलेला होता. दरम्यान, दुचाकी रस्त्यालगतच्या सिमेंटच्या कठड्याला जोरात धडकली. या अपघातात दोघेही गंभीर जखमी झाल्याने त्यांचा मृत्यू झाला. हिंजवडी पोलिस अधिक तपास करीत आहेत.