शूटिंगसाठी आडगावात राहायला तयार नव्हत्या अश्विनी; समोरून निळू फुले आले अन्... त्याच चित्रपटाने घडवला इतिहास

Ashvini Bhave Unknown Facts: लोकप्रिय मराठी अभिनेत्री अश्विनी भावे यांनी ९० च्या दशकात आपल्या अभिनयाच्या आणि सौंदर्याच्या जोरावर प्रेक्षकांच्या मनावर अधिराज्य गाजवलं. त्यांनी अनेक मराठी तसेच हिंदी चित्रपटात काम केलं. त्यांच्या नावाची हिंदी सिनेसृष्टीतही प्रचंड चर्चा होती. त्यांनी अनेक दिग्गज कलाकारांसोबत काम केलं. त्यांनी अशाच एका हिट चित्रपटात दिग्गज अभिनेते निळू फुले यांच्यासोबत काम केलं होतं. मात्र सुरुवातीला अश्विनी या चित्रपटात काम करायला नकार देत होत्या आणि त्याचं कारण होतं तिथे राहायची जागा. शुटिंगच्या ठिकाणी व्यवस्थित राहायला नसल्याने त्यांनी दिग्दर्शकाला नकार दिला होता. मात्र निळू फुले यांच्यामुळे सगळं चित्र बदललं.

या प्रसंगाबद्दल अश्विनी यांनी एका मुलाखतीत सांगितलं आहे. अश्विनी सध्या 'घरत गणपती' चित्रपटात दिसत आहेत. या निमित्ताने त्यांनी आरपार या युट्यूब चॅनेलला मुलाखत दिली. या मुलाखतीत त्या म्हणाल्या, 'एका चित्रपटाच्या शूटिंगला गेले होते आणि खूप आडगावामध्ये टाकलं होतं आम्हाला. राहायची सोय नव्हती. अशी सोडून दिलेली बांधकामं असतात ना त्याच्यावर पत्रे टाकून रूम बनवलेले. ती रूम मला दिलेली. मला तिथे एक महिना काढायचा होता. माझी मुख्य भूमिका होती. मी इतक्या तावातावाने गेले आणि म्हणाले, मी नाही राहणार इथे. आणि समोरून निळू भाऊ आले.'

त्या पुढे म्हणाल्या, 'ते मला म्हणाले, जाऊदेना अश्विनी. चांगला माणूस आहे. चांगला पिक्चर करायचा प्रयत्न करतोय. करून टाकूया. म्हटलं, आईला निळू भाऊ असं म्हणतायत तर मी कोण आहे. आणि मी थांबले. तो चित्रपट होता 'हळद रुसली कुंकू हसलं'. ज्या चित्रपटासाठी मला अर्धा महाराष्ट्र ओळखतो. तो निळूभाऊंमुळे झाला.' अश्विनी यांनी याच मुलाखतीत आपल्या वैयक्तिक आयुष्यावरही भाष्य केलं आहे. आपल्याला कधीच इंडस्ट्रीतील नवरा नको होता. हे आपलं आधीचं ठरलं होतं असं त्यांनी सांगितलं.