70th National Film Awards 2024 : कोल्हापूरकर पठ्ठ्याला मिळाला राष्ट्रीय पुरस्कार! कोण आहे सचिन सूर्यवंशी?

Marathi Entertainment News : नुकतंच 70व्या राष्ट्रीय पुरस्कारांची घोषणा झाली आणि यामध्ये मराठी सिनेमानीही स्वतःचा ठसा उमटवला आहे. दिग्दर्शक परेश मोकाशी यांचा वाळवी या सिनेमाला मराठी विभागातील सर्वोत्कृष्ट चित्रपटाचा राष्ट्रीय पुरस्कार जाहीर झाला. तर कोल्हापूरचे दिग्दर्शक आणि निर्माते सचिन बाळासाहेब सूर्यवंशी यांच्या वारसा या माहितीपटाला सांस्कृतिक चित्रपट या विभागात सर्वोत्कृष्ट माहितीपट हा पुरस्कार जाहीर झाला आहे.

कोण आहेत सचिन सूर्यवंशी ?

मूळचे कोल्हापूरचे असलेले सचिन हे शेतकरी आणि फिल्ममेकरही आहेत. या आधी त्यांनी दर्शन, द सॉकर सिटी या शॉर्टफिल्मची निर्मिती आणि दिग्दर्शन केलं होतं. त्यांच्या या दोन्ही शॉर्टफिल्म्सचं भरभरून कौतुक झालं होत. त्यानंतर त्यांनी वारसा या शिवकालीन मर्दानी खेळावर आधारित माहितीपटाची निर्मिती आणि दिग्दर्शन केलं.

सिनेमाची गोष्ट

छत्रपती शिवाजी महाराजांकडून प्रेरणा घेऊन सुरु झालेल्या मर्दानी खेळाचे स्वरूप आणि एका पिढीकडून पुढच्या पिढीकडे जाणारा या खेळाचा वारसा याची गोष्ट या माहितीपटामध्ये सुंदररित्या दाखवण्यात आली आहे. त्यांच्या या माहितीपटाची राष्ट्रीय स्तरावर दखल घेण्यात आली. त्यांनी या सिनेमाचं दिग्दर्शन आणि निर्मिती केली असून सर्वोत्कृष्ट कला / सांस्कृतिक चित्रपट या विभागात त्यांना हा पुरस्कार जाहीर करण्यात आला.

फिल्मफेअरही पटकावला

या आधी सचिन यांना या माहितीपटासाठी फिल्मफेअर पुरस्कार मिळाला होता. सर्व स्तरातून सचिन यांच्या मेहनतीचं कौतुक करण्यात आलं होतं. तर २ ० १ ९ साली आलेल्या 'द सॉकर सिटी' या शॉर्ट फिल्मही फिल्मफेअर पुरस्कार मिळाला होता. त्यानंतर त्यांना थेट राष्ट्रीय पुरस्कार मिळाल्यामुळे सगळ्या कोल्हापूरकरांना त्यांचा अभिमान वाटतोय. सचिन यांचा हा वारसा माहितीपट युट्युबवर उपलब्ध आहे.

पाहा वारसा :