Aadesh Bandekar: पवईतील मतदान केंद्रातील EVM मशीन बंद; आदेश बांदेकर 3 तास रांगेत उभे, मतदार संतापले

Lokshabha Elections 2024: पवईतील हिरानंदानी येथील मतदार केंद्राच्या बाहेर मतदारांनी लांबच लांब रांगा लावल्या आहेत. या मतदान केंद्रामध्ये मतदान हे अतिशय धीम्या गतीनं सुरु आहे. अनेक नागरिक गेल्या तीन-चार तासांपासून मतदान केंद्राच्या बाहेर उभे आहेत. तसेच सिनेअभिनेते आणि शिवसेना सचिव आदेश बांदेकर (Aadesh Bandekar) देखील लाईनमध्ये उभे होते. आदेश बांदेकर आणि त्यांच्या पत्नी सुचित्रा बांदेकर (Suchitra Bandekar) हे मतदान करण्यासाठी जवळपासून तीन तास रांगेत उभे आहेत. या संपूर्ण घटनेवर आता आदेश बांदेकर यांनी एक व्हिडीओ शेअर करुन संताप व्यक्त केला आहे.

आदेश बांदेकर यांनी शेअर केला व्हिडीओ

आदेश बांदेकर यांनी नुकताच सोशल मीडियावर एक व्हिडीओ शेअर केला आहे. या व्हिडीओमध्ये आदेश बंदेकर आणि मतदान करण्यासाठी आलेले इतर नागरिक संताप व्यक्त करताना दिसत आहे. तसेच काही जेष्ठ नागरिक देखील मत देण्यात बराच वेळ उन्हात उभे राहिले आहेत, असंही व्हिडीओमध्ये दिसत आहे.

व्हिडीओमध्ये दिसत आहे की, आदेश बांदेकर म्हणतात, “मी आता पवई मतदान केंद्रावर आलो आहे. हिरानंदानी हा अतिशय सुशिक्षित विभाग आहे. याठिकाणच्या ५७, ५८ या दोन्ही पोलिंग बूथवरील याद्या बंद झाल्या आहेत. तसेच येथील ईव्हीएम मशिन्स देखील बंद आहेत. हिरानंदानी फाऊंडेशन स्कूल याठिकाणचा हा प्रकार आहे. सकाळपासून सगळ्या मशिन याठिकाणी बंद आहेत. आम्ही एवढा वेळ उभे आहोत पण, कोणीच उत्तर देत नाहीये.”. आदेश बांदेकर यांच्यासोबतच सिने दिग्दर्शक केदार शिंदे यांनी देखील या गोष्टीबद्दल संताप व्यक्त केला. "कितीही उशीर झाला तरी मतदान करुनच जाऊ", असं त्यांनी माध्यमांसोबत बोलताना सांगितलं.