‘गुंतवणुकीतील काही कळत नाही....आता पुरे हा बहाणा!

‘गुंतवणूक करायला हवी’ यावर सगळ्यांचे तात्त्विक एकमत असले, तरी अनेक जण ती टाळताना दिसतात. ‘गुंतवणुकीतील काही कळत नाही’, ‘पैसे अडकवून ठेवायचे नाहीत,’ ‘जोखीम घ्यायची नाही’ असे काही तरी बहाणे करून गुंतवणुकीबाबतची कृती टाळली जाते. असे बहाणे कोणते आणि ते किती पोकळ असतात आणि त्या संदर्भातील विचारांची दिशा कशी बदलली पाहिजे याबाबत मंथन.


दिवाळीच्या पार्श्वभूमीवर आम्ही काही लोकांशी गुंतवणूक या विषयावर संवाद साधला. या लोकांपैकी ‘नियमितपणे आर्थिक गुंतवणूक करायला हवी’ या मताशी सर्वचजण सहमत झाले. वाढती महागाई, नोकरी-व्यवसायातील अस्थिरता, निवृत्तीनंतर होणारी आर्थिक ओढाताण, वाढते औषधोपचार खर्च या आर्थिक संकटांमुळे प्रत्येक व्यक्तीने गुंतवणुकीला प्राधान्य दिले पाहिजे असे सर्वांचेच म्हणणे होते. मात्र, ‘आपण नियमितपणे आर्थिक गुंतवणूक करता का?’ या प्रश्नावर मात्र अनेकजणांचे नकारार्थी उत्तर होते. त्यामागील कारणे जाणून घेतल्यावर असे लक्षात आले, की त्यातील बहुसंख्य कारणे ही आर्थिक स्वरूपाची नसून मानसिक स्वरूपाची आहेत. खरे तर गुंतवणूक सुरू न करण्याचे हे बहाणे आहेत. यातील काही प्रातिनिधिक बहाणे पुढे दिले आहेत. या व्यक्तींप्रमाणेच आपणही असे काही बहाणे देत नाही ना हे तपासून पाहा.