शेतकऱ्याची लेक ते लेफ्टनंट कर्नल पदापर्यंतचा प्रवास, मीनल शिंदेची यशोगाथा
तनिष्का डोंगरे
आपल्या पालकांचे स्वप्न सत्यात उतरवण्यासाठी धडपडणाऱ्या सर्वसामान्य घरातील रणरागिणीची यशोगाथा इतर महिलांसाठी प्रेरणादायी ठरते. अशा कथांमुळे अनेकींमध्ये विश्वास निर्माण होतो. अशाच एका सर्वसामान्य घरातील प्रेरणादायी व्यक्तिमत्त्वाची यशोगाथा तरुणींना दिशादर्शक आणि त्यांचे करिअर घडविण्याच्या दृष्टीने महत्त्वाची ठरणारी आहे, ती म्हणजे मीनल शिंदे-चव्हाण यांची.
सातारा जिल्ह्यातील हनुमानवाडी (उंब्रज) येथील मीनल शिंदे शेतकरी कुटुंबातील. अत्यंत सामान्य कुटुंबामध्ये वावरणाऱ्या मीनल यांची स्वप्ने साधीच होती. परंतु, ती पूर्ण करण्यासाठी त्यांची जिद्द मात्र तितकीच मोठी होती. एका वेगळ्या करिअरला गवसणी त्यांनी घातली आणि ती यशस्वी करण्याचे कामही त्यांनी केले. आपल्या वडीलांचे नाव उंच करण्याचे ध्येय गाठताना त्यांना दिशा मिळाली ती देशसेवेची.
देशसेवेचे व्रत घेतल्यानंतर त्यांनी त्यांच्या कार्यातून आपला ठसा उमटवला. महिला असल्याचे कोणतेही अवडंबर न करता आपली कामगिरी कशी उत्तम होईल आणि त्यातून कशी देशाची सेवा होईल याकडे त्यांचे सतत लक्ष असते. विविध ठिकाणी कर्तव्य बजावणाऱ्या मीनल शिंदे-चव्हाण या रणरागिणीने नुकतीच लेफ्टनंट कर्नलपदी झेप घेतली. त्यांच्या या कामगिरीमुळे त्यांचे गाव असलेल्या सातारचे नाव तर त्यांनी उज्ज्वल केलेच शिवाय त्यांचे सासर असलेल्या कोल्हापूरच्याही त्या शान झाल्या. नुकतीच त्यांनी कमांडिंग ऑफिसर कर्नल चेतन मोसन यांच्या हस्ते लेफ्टनंट कर्नलपदाची सूत्रे स्वीकारली.