Share Market : तू हाँ कर, या ना कर..

भूषण महाजनहिंदी चित्रपटात असते तशी ‘घरवाले तुझे मरने नही देंगे और बाहरवाले तुझे जीने नही देंगे’ ही बाजाराची अवस्था आहे. आपले धोरण पुन्हा तेच! निफ्टीची रेंज २३९०० ते २५००० धरून २५०००च्या जवळ विक्री केल्याशिवाय राहायचे नाही आणि स्क्रीपनिहाय बाजार खाली आल्यास खरेदी केल्याशिवाय राहायचे नाही. .गेल्या सप्ताहात आपल्याच नव्हे, तर जगभरच्या बाजारात अनेक खळबळजनक घडामोडी झाल्या. जपानच्या मध्यवर्ती बँकेने ‘जगातील मोठ्या अर्थव्यवस्थांपैकी एक’ हे आपले स्थान टिकवून ठेवण्याच्या आशेने चलनवाढीला चालना देण्यासाठी सुमारे दशकभरापासून व्याजदर शून्य किंवा त्याहून कमी ठेवले होते. मार्चमध्ये व्याजदर उणे ०.१ टक्क्यावरून +०.१ टक्के करण्यात आले होते. नुकतीच त्यात पुन्हा वाढ करून ते ०.२५ टक्के करण्यात आले आहेत. या बातमीने जगभरचे बाजार कोसळले आणि तेजीवाल्या पंटर्सना पळता भुई थोडी झाली. अमेरिका ४-६ टक्क्यांनी व्याजदर वाढवत होती ते जगाने सहन केले, पण जपानचे १५ पैसे सर्वच बाजारांना पचवायला जड गेले. तिथले बँकर्स कदाचित म्हणत असतील,हम आह भी लेते हैं, तो हो जाते हैं बदनामवो कत्ल भी करते हैं, तो चर्चा नही होतीह्याचे कारण असे, की शून्य किंवा त्यापेक्षा कमी दर असलेल्या जपानच्या बँकांतून भांडवल उचलायचे आणि ते जगभरच्या सर्व प्रकारच्या सट्टाबाजारात वापरायचे व त्यातून दुहेरी नफा कमवायचा या प्रकाराला येन कॅरी ट्रेड असे म्हणतात. येन सशक्त व्हायला लागला व व्यवहार फार अंगावर यायला लागला, तर तो ‘सरका’ (Square off) करून मोकळे व्हायचे ही नीती. १४ जुलै रोजी डॉलरला १६१ येन असा दर होता, तो आता १४४वर आला आहे. साहजिकच पंटर्सचे धाबे दणाणले व तेजी फोडायची आणि जपानी बँकेचे भांडवल परत करायचे ही घाई सुरू झाली. त्यातून गेल्या सप्ताहात आशियाई व जगभरातील सर्वच बाजार (त्यात शेअर बाजार, कमोडीटी बाजार सारेच आले) १० ते १३ टक्के खाली आले. भारतीय शेअर बाजारांनी मात्र परिस्थिती संयमाने हाताळली. ४-४.५ टक्के खाली आले, पण सप्ताहाअखेरीस निफ्टी जेमतेम दीड टक्क्याने खाली आली. तेरा दिवसांच्या चल सरासरीचा आधार घेत निफ्टी २३९०९ अंशावरून उसळून वर गेली. आता सारेच बाजार सावरले आहेत. येन कॅरी ट्रेडही ७५ टक्के सुलटला आहे असे कळते. जपानमधील व्याजदर पुन्हा वर गेले तरच पुन्हा धोका संभवतो.येन कॅरी ट्रेडची भानगड चालू असतानाच बांगलादेशचे सरकार बरखास्त झाले व आंदोलकांनी जाळपोळ करत पंतप्रधान शेख हसीना ह्यांना देश सोडण्यास भाग पाडले. तेथील दंगा व वस्त्रोद्योगातील त्या देशाचा वाटा बघता आपल्याकडील टेक्स्टाईल स्टॉक्स वाढले, पण ही तेजी तात्पुरतीच समजली पाहिजे. आपल्याकडचे टीकाकार नेहमी बांगलादेशच्या अर्थव्यवस्थेचे उदाहरण देत चिमटे काढतात. इस्लामिक देश असूनही तेथे स्त्रिया रात्रपाळीत काम करू शकतात. तसेच पाश्चात्त्य देशांसारखे कामावर ठेवा, पसंत नसल्यास काढून टाका (Hire and Fire) असे कामगार कायदे आहेत. आपल्या देशातील कामगार संघटना अत्यंत मजबूत असल्यामुळे असे आपल्याकडे होणे शक्य नाही. पण तेथील वस्त्रोद्योगात अंदाजे ४० लाख स्त्रिया काम करतात. बांगलादेशातील आंदोलनाचे मूळ कारण बेरोजगारी आहे, हे लक्षात घेतले पाहिजे. त्यातूनच त्यांनी तयार कपडे निर्यातीत भारताला मागे टाकले आहे. जीडीपी वाढ आपल्यापेक्षा अधिक असली, तरी महागाईदर ९-१० टक्क्यांवर गेला आहे. तेव्हा महागाई दर ५ ते ६ टक्के व व्याजदर ७ टक्के व जोडीला विकासाची गती ७.२ टक्के असलेला आपला देश ‘सारे जहाँ से अच्छा’ आहे यात शंका नाही. .आपल्या चारही दिशेला कमी-जास्त प्रमाणात अराजक आहे, ही काही फारशी चांगली स्थिती नाही. आपल्या परराष्ट्रीय धोरणाची ही परीक्षाच आहे. परिस्थिती लवकरच नियंत्रणात यावी ही अपेक्षा.या मागोमाग रिझर्व्ह बँकेची निर्धारित बैठक झाली. सलग नवव्या बैठकीत रेपो दर कायम (६.५ टक्के) ठेवण्याचा निर्णय झाला. एकुणात महागाई कमी झाली असली, तरी अन्नधान्याची महागाई गेले आठ महिने ८ टक्क्यांच्या आसपास आहे. त्यासाठी शेतकऱ्याच्या बरोबरीने रिझर्व्ह बँकही पावसाकडे डोळे लावून बसली आहे. समितीने महागाई दर ४.५ टक्के व विकास दर ७.२ टक्के हे ध्येय ठेवले आहे आणि ते गाठेपर्यंत किंवा फेडने व्याजदर कमी करेपर्यंत आपल्याकडे फारसे काही होणार नाही, हे गृहीत धरले पाहिजे. साहजिकच शेअर बाजाराला हा निर्णय आवडला नाही. सेन्सेक्स व निफ्टी एक टक्का घसरले. त्यात खासगी व सरकारी बँकांच्या ठेवींमध्ये, कर्जाच्या प्रमाणात वाढ होत नाही ही नोंद घेऊन बँकांचे शेअर घसरले. .ह्या साऱ्या घटनांवर कळसाध्याय रचला तो हिंडेनबर्गच्या नव्या आरोपांमुळे. ह्यावेळी हिंडेनबर्गने सेबीच्या अध्यक्षावरच स्पुटनिक सोडले आहे. अध्यक्षा माधवी बुच ह्यांचेच अदानी उद्योग समूहात हितसंबंध गुंतलेले असल्यामुळे त्यांनी ह्या समूहावर कुठलीही कारवाई केली नाही, असे हिंडेनबर्गचे म्हणणे. ह्यासंबंधी ३६० वन नावाच्या फंडाने स्पष्टीकरण दिले आहे, की त्यांच्या आयपीई - प्लस नावाच्या योजनेत अदानी समूहाच्या काही बॉण्ड्समध्ये गुंतवणूक केली होती (फंडाची ९० टक्के गुंतवणूक रोखे बाजारात आहे) व ह्या योजनेत सेबी प्रमुखांनी, त्यांच्या नेमणुकीआधी २०१३मध्ये फक्त १.५ टक्के भांडवल गुंतवले होते. ह्या बादरायण संबंधांमुळे वरील आरोप झालेला दिसतो. ह्याही आरोपाची रीतसर चौकशी होईल व खरे काय ते कळेलच. परंतु अत्यंत निःस्पृह कारकीर्द असलेल्या सेबी अध्यक्षांवर किंवा कुणावरही आरोप होऊ शकतात, हे लक्षात घेतले पाहिजे. विरोधी पक्षही ह्याचा फायदा उचलून संसदेत गोंधळ करू शकतात. भारतीय शेअर बाजारात गुंतवणूक खालच्या भावात करायच्या हेतूने तर असे बेबंद व बेधुंद आरोप होत नाहीत ना, अशी शंका यायला जागा आहे.आपले स्थानिक गुंतवणूकदार मात्र शेअर बाजाराच्या पूर्ण प्रेमात आहेत. जुलै महिन्यात एसआयपीचा ओघ वाढत ₹ २३ हजार कोटी रुपयांवर पोहोचला. तात्पर्य काय, तू हाँ कर, या ना कर, तूच आमची आशा आहेस असे शेअर बाजाराकडे पाहून मध्यमवर्गाने ठरवलेले दिसते. ह्यातून आपण असा निष्कर्ष काढावा, की हिंदी चित्रपटात असते तशी ‘घरवाले तुझे मरने नही देंगे और बाहरवाले तुझे जीने नही देंगे’ ही बाजाराची अवस्था आहे. आपले धोरण पुन्हा तेच! निफ्टीची रेंज २३९०० ते २५००० धरून २५०००च्या जवळ विक्री केल्याशिवाय राहायचे नाही आणि स्क्रीपनिहाय बाजार खाली आल्यास खरेदी केल्याशिवाय राहायचे नाही. असो.फार्मा उद्योगात डॉ. रेड्डी मागे अभ्यासाला सुचवला होता. आजही जेमतेम २०च्या पी/ई गुणोत्तराला मिळणारा हा शेअर मुख्य फार्मा शेअरमध्ये वाजवी किमतीला आहे असे वाटते. चालू वर्षाच्या पहिल्या तिमाहीत विक्री व नफा छान वाढला आहे. एकूण भांडवलावर उतारा २६ टक्के असून विक्री व निर्यात वाढती आहे. ₹ ६,७५० ते ६,८५० या दरम्यान रडारवर ठेवल्यास आपल्या सल्लागाराला विचारून निर्णय घेता येईल.(भूषण महाजन शेअर बाजाराचे विश्लेषक आहेत.)महत्त्वाचे : या लेखात सुचवलेले शेअर अभ्यासपूर्वक गुंतवणुकीसाठी आहेत. शेअर बाजाराच्या जोखमीचे आकलन करून घेऊन आपापल्या सल्लागाराचे मत व सल्ला घेऊनच गुंतवणूक करावी. शेवटी स्टॉपलॉसला पर्याय नाही, हे लक्षात ठेवावे. तसेच लेखकाने व त्यांच्या गुंतवणूकदारांनी येथे गुंतवणूक केलेली आहे, हेही ध्यानात घ्यावे.----------------------.सकाळ+ चे सदस्य व्हा ब्रेक घ्या, डोकं चालवा, कोडे सोडवा!शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates, मराठी ताज्या बातम्या, मराठी ब्रेकिंग न्यूज, मराठी ताज्या घडामोडी. And Live taja batmya on Esakal Mobile App. Download the Esakal Marathi news Channel app for Android and IOS.

Share Market : तू हाँ कर, या ना कर..

Related Stories

Share Market Holiday: 27 की 28 मे? बकरी ईदच्या सुट्टीवरून गुंतवणूकदारांमध्ये संभ्रम; जाणून घ्या शेअर बाजार कधी बंद

शेअर बाजार : शेअर बाजार सध्या आकर्षक का?

Premium|Share Market Analysis : युद्ध, आयटी निकाल व वेदांत विभाजनाच्या पार्श्वभूमीवर गुंतवणूकदारांनी काय करावे?