पुणे : 60 रुपयांची अंडाभुर्जी पडली 23 हजाराला

पुणे : स्वारगेट बस स्थानकाजवळील हातगाडीवर अंडाभुर्जी खाण्यासाठी गेलेल्या तरुणास महिलेसह तिघांनी रस्त्यात अडवून लुबाडले. रोख रक्कम व मोबाईल, असा 23 हजार रुपयांचा ऐवज चोरला. ही घटना रविवारी रात्री साडेनऊ वाजता घडली. याप्रकरणी स्वारगेट पोलिसांनी दोघांना अटक केली.

तुकाराम किसन जाधव (वय 26, रा. लोहार, उस्मानाबाद), राघवेंद्र इराचंद्र इरेळी (वय 25, रा. जत, सांगली) अशी अटक केलेल्यांची नावे आहेत. त्यांच्या समवेत असलेल्या महिलेविरुद्ध गुन्हा दाखल झाला आहे. याप्रकरणी अक्षय शिंदे (वय 23 , रा. रायकर मळा, धायरी) याने फिर्याद दिली. अक्षय त्याचा मित्र युवराज ढावरे याच्यासह दुचाकीवर फिरायला गेला होता.

भूक लागल्याने ते स्वारगेटजवळील हातगाडीवर अंडा भुर्जी खाण्यासाठी गेले. भुर्जी खाल्यानंतर युवराज तेथून निघून गेला. तर अक्षय रस्ता ओलांडून पीएमपी बस थांब्याजवळ लावलेल्या त्याच्या दुचाकीकडे जात होता. त्या वेळी संबंधित महिलेने त्यास अडविले. तेथे आलेल्या तुकाराम जाधव व राघवेंद्र इरेळी यांनी शिवीगाळ करून जबरदस्तीने खिशातील मोबाईल व रोख रक्कम असा 23 हजार रुपयांचा ऐवज काढून घेतला. या घटनेनंतर अक्षयने स्वारगेट पोलिसांकडे धाव घेतली. त्यानंतर पोलिसांनी दोघांना ताब्यात घेतले. पळून गेलेल्या महिलेचा शोध सुरू आहे.