Pune Crime : धक्कादायक! 28 वर्षीय महिलेनं अल्पवयीन मुलावर केले लैंगिक अत्याचार, धमकी देऊन मोबाईलमध्ये...

पुणे : एका महिलेने १७ वर्षीय मुलाला जबरदस्तीने शारीरिक संबंध करण्यास भाग पाडून त्याचे व्हिडिओ चित्रीकरण करवून घेतल्याची घटना समोर आली आहे. या प्रकरणी कोंढवा पोलिसांनी २८ वर्षीय महिलेविरुद्ध गुन्हा दाखल केला आहे.

याबाबत पीडित अल्पवयीन मुलाने फिर्याद दिली आहे. वरिष्ठ पोलिस निरीक्षक संतोष सोनवणे यांनी दिलेल्या माहितीनुसार, महिलेच्या पतीचे कोरोनामुळे निधन झाले आहे. अल्पवयीन मुलगा महिलेच्या घराशेजारी राहतो. या महिलेने मुलाला ‘माझ्यासोबत जबरदस्ती केल्याची तक्रार पोलिसांत देईन,’ अशी धमकी देऊन शारीरिक संबंध करण्यास भाग पाडले.

त्यानंतर पुन्हा मुलाशी शारीरिक संबंध साधत त्याचे व्हिडिओ चित्रीकरण करण्यास सांगितले. एक मे २०२१ पासून नोव्हेंबर २०२२ या कालावधीत हा प्रकार घडला. ही बाब मुलाच्या चुलत्याच्या निदर्शनास आली. चुलता आणि मुलाच्या कुटुंबीयांनी त्या महिलेला समज दिली. परंतु महिलेने त्यांचे ऐकले नाही. त्यानंतर पीडित मुलाच्या कुटुंबीयांनी पोलिस ठाणे गाठले. याबाबत मुलाने तक्रार दिल्यानंतर पोलिसांनी महिलेविरुद्ध लैंगिक अपराधापासून बालकांचे संरक्षण अधिनियमानुसार गुन्हा दाखल केला आहे.