पुणे जिल्ह्यात ८८६ कोटींची कर्जमाफी; सव्वा लाख शेतकऱ्यांना लाभ

पुणे : महात्मा जोतिराव फुले शेतकरी कर्जमुक्ती योजनेत आज अखेरपर्यंत (ता.२३) पुणे जिल्ह्यातील १ लाख २५ हजार ५४३ शेतकऱ्यांचे ८८६ कोटी १४ लाख रुपयांचे पीक कर्ज माफ झाले आहे. कर्जमाफीची ही रक्कम या सर्व शेतकऱ्यांच्या बॅक खात्यात जमा करण्यात आली आहे. दरम्यान, या योजनेंतर्गत पीक कर्ज माफ झालेल्या एकूण शेतकऱ्यांपैकी ८६ हजार १६२ शेतकऱ्यांनी यंदा पुन्हा एकदा पुणे जिल्हा मध्यवर्ती सहकारी बँकेकडून ६०२ कोटी ७६ लाख रुपयांचे पीक कर्ज नव्याने घेतले आहे.

- ताज्या बातम्यांसाठी डाऊनलोड करा ई-सकाळचे ऍप

- पुण्याच्या बातम्या वाचण्यासाठी येथे ► क्लिक करा 

राज्य सरकारने पीक कर्जमाफी योजनेला महात्मा जोतिराव फुले शेतकरी कर्जमुक्ती योजना-२०१९ असे नाव दिले आहे. या योजनेंतर्गत आतापर्यंत पुणे जिल्ह्यातील १ लाख ३६ हजार ३४६ शेतकऱ्यांची कर्ज खाती सरकारच्या पोर्टलवर अपलोड करण्यात आलेली आहेत. यापैकी १ लाख २६ हजार ४९३ खाते आधार प्रमाणीकरणासाठी पुणे जिल्हा बँकेकडे प्राप्त झाली आहेत. यापैकी १ लाख २५ हजार ९१४ कर्ज खात्यांचे आधार प्रमाणीकरण बॅंकेच्यावतीने पूर्ण करण्यात आले आहे.

पूर्वीचे कर्जमाफ झाल्यानंतर पुन्हा यंदा पीक कर्ज घेतलेल्या शेतकऱ्यांचे प्रमाण सुमारे ७० टक्के एवढे आहे. कर्ज वाटपाचे हे प्रमाण राज्यात सर्वाधिक ठरले असल्याचे जिल्हा बँकेचे अध्यक्ष रमेश थोरात यांनी सांगितले.

पुणे जिल्हा बँकेला चालू वर्षाच्या खरीप आणि रब्बी हंगामातील पिकांसाठी अग्रणी बॅंकेने २ हजार १०४ कोटी रुपयांचे कर्ज वाटपाचे उद्दिष्ट देण्यात आले होते. यापैकी आज अखेरपर्यंत २ हजार २१ कोटी ६२ लाख रुपयांचे वाटप करण्यात आले आहे. कर्ज वाटपाचे हे प्रमाण एकूण उद्दिष्टाच्या ९१.७० टक्के इतके झाले आहे.

कोट राज्यातील अन्य जिल्हा बॅंकांच्या तुलनेत पुणे जिल्हा बॅंकेने सर्वाधिक पीक कर्ज वाटप केले आहे. शिवाय कोरोनामुळे उदभवलेल्या स्थितीमुळे आर्थिक अडचणीत सापडलेल्या शेतकऱ्यांना दिलासा देण्यासाठी पीक कर्ज परतफेडीसाठी मुदतवाढ आणि पीक कर्ज व्याजात सवलत दिली आहे. - रमेश थोरात, अध्यक्ष, जिल्हा बॅक, पुणे.