लष्करी वैद्यकीय महाविद्यालयाच्या संचालक आणि प्रमुखपदी आरती सरीन यांची नियुक्ती

पुणे - येथील लष्करी वैद्यकीय महाविद्यालयाच्या (एएफएमसी) संचालक आणि प्रमुखपदी सर्जन व्हाइस ॲडमिरल आरती सरीन यांची नियुक्ती करण्यात आली आहे. त्यांनी नुकतेच आपले पदभार स्वीकारले.

व्हाइस ॲडमिरल सरीन या एएफएमसीच्या माजी विद्यार्थी असून २६ डिसेंबर १९८५ मध्ये त्यांची सशस्त्र वैद्यकीय सेवांमध्ये (एएफएमएस) नियुक्ती करण्यात आली. त्यांनी पुण्यातील एएफएमसीमधून रेडिओडायग्नोसिस आणि मुंबई येथील टाटा मेमोरिअल हॉस्पिटलमधून रेडिएशन ऑन्कोलॉजीमधील विशेष प्रावीण्यासह पदव्युत्तर पदवी मिळवली आहे. याव्यतिरिक्त पिट्सबर्ग विद्यापीठात गामा नाईफ सर्जरीचे प्रशिक्षण सरीन यांनी पूर्ण केले आहे.

आपल्या ३७ वर्षांच्या सेवाकार्यकाळात त्यांनी महत्त्वाच्या शैक्षणिक आणि प्रशासकीय नियुकत्यांवर जबाबदारी पार पाडली आहे. यामध्ये दिल्लीतील आर आर लष्करी रुग्णालय आणि कमांड रुग्णालय व एएफएमसी (पुणे) येथील रेडिएशन ऑन्कोलॉजी विभागाच्या प्रमुख, मुंबई येथील आयएनएस अश्र्विनीच्या कमांडंट आदींचा समावेश आहे. त्यांच्या उत्कृष्ट कारकिर्दीसाठी त्यांना २००१ मध्ये नेव्हल स्टाफ कमेंडेशन, २०१३ मध्ये जनरल ऑफिसर कमांडिंग-इन-चीफ कमेंडेशन तसेच २०१७ मध्ये ‘आर्मी स्टाफ कमेंडेशन’ आणि २०२१ मध्ये विशिष्ट सेवा पदकाने सन्मानित करण्यात आले आहे.