Accident Compensation : अपघाती मृत्यू झालेल्या नोकरदाराच्या कुटुंबीयांना एक कोटी १५ लाखांची नुकसान भरपाई

पुणे - ट्रकच्या धडकेने मृत्युमुखी पडलेल्या दुचाकीस्वार तरुणाच्या कुटुंबीयांना एक कोटी १५ लाख रुपयांची नुकसान भरपाई देण्याचे आदेश मोटार अपघात न्यायप्राधिकरणाने दिला. न्याय प्राधिकरणाचे सदस्य असलेले जिल्हा न्यायाधीश जे. जी. डोरले यांनी हा आदेश दिला.

मुंबई-बंगळूर बाह्यवळण मार्गावर ७ मे २०१९ ला हा अपघात झाला होता. अपघातात गंभीर जखमी झालेल्या तरुणाचा मृत्यू झाला. मृत्युमुखी पडलेला तरुण खासगी रुग्णालयात तंत्रज्ञ होता. त्याला दरमहा ३७ हजार वेतन मिळत होते, तसेच तो एका खासगी रुग्णालयातील क्ष किरण विभागात अर्धवेळ काम करत होता. तेथे त्याला दरमहा १२ हजार पगार मिळत होते. ३५ वर्षीय तरुणाच्या वेतनावर त्याचे कुटुंब अवलंबून होते.

तरुणाची पत्नी आणि कुटुंबातील सदस्यांनी ॲड. अनिल पटणी आणि ॲड. आशिष पटणी यांच्यामार्फत नुकसान भरपाई मिळवण्यासाठी दावा केला होता. डंपर मालक आणि त्याची विमा कंपनी एस. बी. आय. जनरल इन्शुरन्स कंपनीविरुद्ध दावा दाखल करण्यात आला होता. दाव्यात दाखल झालेली कागदपत्रे, तसेच साक्ष आणि पुरावे ग्राह्य धरुन न्यायालयाने ८७ लाख रुपयांची नुकसान भरपाई देण्याचे आदेश दिले.

दावा दाखल झाल्यापासून दरमहा आठ टक्के व्याजदराने एकूण मिळून एक कोटी १५ लाख रुपये न्यायालयात जमा करण्याचे आदेश न्यायालयाने दिले. विमा कंपनीच्यावतीने ॲड. बाठिया यांनी काम पाहिले.