मृत्युंजय दुतांकडून अपघातग्रस्तांना मिळतेय वेळेवर मदत

सातगाव पठार : आंबेगाव येथील मृत्युंजय दुतांनी पुणे-नाशिक राष्ट्रीय महामार्गावरील माळेगाव ता.खेड च्या हद्दीत झालेल्या अपघातातील जखमींचे प्राण वाचवत त्यांना उपचारासाठी दवाखान्यात दाखल केले. पेठ येथील मृत्युंजय दुतांनी पेठ परिसरात आत्तापर्यंत झालेल्या अपघातांतील बावीस जखमींचे प्राण वाचवले असल्याची माहिती आळेफाटा महामार्ग पोलीस मदत केंद्राचे पोलीस उपनिरीक्षक संजय सुतनासे यांनी दिली. (Pune News)

दरम्यान आज दि. १४ रोजी पुणे-नाशिक राष्ट्रीय महामार्गावरील धनश्री हॉटेल समोर सकाळी साडेसहा वाजण्याच्या सुमारास दोन ट्रक यांचा अपघात झाला. सदर अपघातात ट्रक क्रमांक जि.जे.१७ झेड. ७५३६ हा खराब झाल्याने रोडचे बाजूस घेऊन काम चालू असताना कँटेनेर नंबर आर.जे.१४ जि.एल.९६६५ चा चालकाने झोपेत निष्काळजीपणे गाडी चालवून टाटा ट्रक ला पाठीमागून धडक दिल्याने अपघात झाला सदर अपघात मनोज किशोर सिंग वय २५ वर्ष व गजे सव्हाण सिंग वय २८ वर्षे दोन्ही राहणार राजस्थान आणि गणपत प्रभात परमाळे वय ४० वर्ष व सलीम बाबू मिर्झा वय ३२ वर्षे दोन्ही राहणार गुजरात हे गंभीर जखमी झाले आणि ट्रकमध्ये अडकुन पडले होते.

अपघाताची माहिती मिळताच महामार्ग पोलीस मदत केंद्र आळेफाटा येथील पोलीस उपनिरीक्षक संजय सुतनासे, सहाय्यक पोलीस उपनिरीक्षक प्रकाश मडके व पोलीस हवालदार योगेश गायकवाड हे तात्काळ घटनास्थळी जाऊन त्यांनी मृत्युन्जय दूत यांच्या मदतीने जखमींना बाहेर काढून खाजगी रूग्णवाकिेव्दारे तृप्ती हॉस्पिटल खेड येथे उपचारासाठी दाखल केला.

आळेफाटा महामार्ग हद्दीत एकूण २७ मृत्युंजय दुत टीम स्थापन करण्यात आलेले असून सर्वांना अपर पोलीस महासंचालक भूषण कुमार उपाध्याय, पोलीस अधीक्षक संजय जाधव, प्रीतम यावलकर, सर्व उपविभागीय अधिकारी व शंकर शिंदे पोलीस निरीक्षक यांचे मार्गदर्शनाखाली व सूचनेप्रमाणे सर्वांना एक स्टेचर व प्रथम उपचार किट वाटप करण्यात आलेली आहे. पेठ येथील दिलीप धुमाळ, अशोक राक्षे, तुषार तोडकर, सर्फराज तांबोळी, दिलीप पवळे या मृत्युंजय दूतांचे चांगल्या कामगिरीबद्दल नागरीकांकडून अभिनंदन केले जात आहे.