पुण्यातील धक्कादायक घटना; अल्पवयीन मुलीवर तिघांनी बलात्कार करून झाडली गोळी

पुणे : वाढदिवसाचा बहाणा करून अल्पवयीन मुलीवर तिघांनी बलात्कार केला. त्यानंतर मुलीवर गोळी झाडल्याचा धक्कादायक प्रकार उघडकीस आला आहे. याप्रकरणी दत्तवाडी पोलिस ठाण्यात पाच जणांविरुद्ध गुन्हा दाखल केला. ही घटना मागील आठवड्यात घडली. याप्रकरणी जनता वसाहत येथे राहणाऱ्या 16 वर्षीय मुलीने फिर्याद दिली आहे. त्यावरुन 5 जणांविरुद्ध अपहरण, बलात्कार केल्याप्रकरणी गुन्हा दाखल केला आहे. आरोपी आणि पीडित मुलगी हे एकमेकांच्या ओळखीचे आहेत.

- इतकं तर मी मुख्यमंत्र्यांसाठीही करत नाही; चिडलेल्या नुसरत जहाँचा VIDEO भाजपने केला शेअर​

पीडित मुलगी जनता वसाहत परिसरात राहते. तिच्या मैत्रीणीने मागील आठवड्यात तिच्या एका मित्राच्या वाढदिवसाला वारजे येथे जायचे असल्याचे सांगून पीडितेला तिकडे नेले. दरम्यान, वाढदिवस झाल्यानंतर आरोपींनी फिर्यादी मुलीला एका खोलीत नेले. तिथे तिघांनी तिच्यावर बलात्कार केला. या घटनेनंतर मुलगी घरी जाण्यास निघाली. त्यावेळी आरोपींनी तेवढ्यावरच न थांबता आरोपीने त्यांचे आणखी दोन मित्र येणार असल्याचे सांगितले. त्यावेळी फिर्यादी मुलीने त्यास नकार देऊन घरी जायचे असल्याचे सांगितले. या प्रकारामुळे चिडलेल्या आरोपीने खोलीच्या पोटमाळ्यावरील पिस्तुल आणली. पिस्तुलातून मुलीवर गोळी झाडली. मुलीने तिच्याकडील मोबाईल छातीजवळ धरला होता, पिस्तुलाची गोळी मोबाईलवर लागल्याने मुलगी गंभीर जखमी झाली नाही. या घटनेनंतर मुलगी आणि तिची मैत्रीण कात्रज येथे गेल्या, तेथे मुलीवर उपचार केल्यानंतर त्या दोघी घरी गेल्या.

- पुण्यात चोरट्यांनी अख्ख दुकान फोडलं, पण होमगार्ड जवानांनी साधं हटकलं सुद्धा नाही​

दरम्यान, बेकायदा पिस्तुल बाळगल्याप्रकरणी गुन्हे शाखेच्या युनिट 2 च्या पथकाने एका आरोपीस अटक केली होती. संबंधित आरोपीची चौकशी केल्यानंतर हा धक्कादायक प्रकार उघडकीस आला. या वृत्तास दत्तवाडी पोलिस ठाण्याचे वरिष्ठ पोलिस निरीक्षक कृष्णा इंदलकर यांनी दुजोरा दिला.

- पुणे शहर आणि जिल्ह्यातील बातम्या वाचण्यासाठी येथे ► क्लिक करा

(Edited by: Ashish N. Kadam)