बारामती शहरात विनापरवानगी जाहिराती लावल्यास कारवाई

बारामती - शहरातील कोणत्याही भिंतींवर आपल्या व्यवसायाच्या जाहिराती नगरपालिकेच्या पूर्वपरवानगीशिवाय लावता येणार नाहीत. नगरपालिकेची पूर्वपरवानगी न घेता कोणत्याही सार्वजनिक ठिकाणी जाहिराती लावणाऱ्या विरुद्ध शहर पोलिस थेट कारवाई करणार आहेत.

याबाबत बारामती शहर पोलिस ठाण्याचे पोलिस निरीक्षक सुनील महाडीक यांनी माहिती दिली की, बारामती शहरातील सार्वजनिक ठिकाणी आपल्या व्यवसायाच्या जाहिरातींचे पोस्टर्स चिटकवून शहराचे विद्रूपीकरण केले जात आहे.

वारंवार याबाबत आवाहन करूनही प्रतिसाद न मिळाल्याने अखेर आता पोलिसांनी कायद्याचा बडगा उगारला आहे. यापुढील काळात बारामती शहरात सार्वजनिक ठिकाणी पोस्टर्स बॅनर्स तसेच कोणत्याही प्रकारच्या जाहिराती नगरपालिकेच्या पूर्वपरवानगीशिवाय लावल्या, तर त्यांच्याविरुद्ध थेट कायदेशीर कारवाई करत गुन्हा दाखल केला जाईल, असा इशारा सुनील महाडीक यांनी दिला आहे.

बारामती शहरात अनेक ठिकाणी अशी पोस्टरबाजी करून शहरातील विविध भागांचे विद्रूपीकरण केले जात आहे, ज्या व्यवसायाची जाहिरात असेल त्या व्यावसायिकांवर देखील यापुढील काळात कारवाई होणार आहे. त्यामुळे अशा पोस्टरबाजीपासून व्यापारी व जाहिरातदारांना सावध राहावे लागणार आहे.