लोणी काळभोर (पुणे) : पूर्व हवेलीमधील सर्वच ग्रामपंचायत हद्दीत यापुढील काळात मास्क न घालता घराबाहेर पडणारा असो वा रस्त्यावर थुंकणारा असो, अशा दोघांवरही पाचशे रुपयांचा दंड व कायदेशीर कारवाई करण्याचे आदेश हवेलीचे उपविभागीय अधिकारी सचिन बारवकर यांनी दिले आहेत. दरम्यान, पूर्व हवेलीमधील ग्रामपंचायत प्रशासनाने वरील आदेशाची प्रभावीपणे अंमलबजावणी न केल्यास संबंधित ग्रामपंचायतीचे सरपंच, उपसरपंच व ग्रामपंचायत प्रशासनावरच आपत्ती व्यवस्थापन कायद्यांतर्गत कारवाई करावी लागेल, असा इशाराही हवेलीचे उपविभागीय अधिकारी सचिन बारवकर यांनी लोणी काळभोर येथे रविवारी दिला.
पूर्व हवेलीमधील उरुळी कांचन, थेऊर, कदमवाकवस्ती व कुंजीरवाडी मांजरी बुद्रुक या प्रमुख पाच ग्रामपंचायत हद्दीतील कोरोनाचा वाढता प्रादुर्भाव रोखण्यासाठी लोणी काळभोर ग्रामपंचायत कार्यालयात महसूल विभाग, ग्रामपंचायत प्रशासन, वरिष्ठ पोलिस अधिकारी, आरोग्य खात्याचे वरिष्ठ अधिकारी यांची संयुक्त बैठक घेतली.
या वेळी हवेली पंचायत समितीचे उपसभापती सनी काळभोर, तहसीलदार सुनील कोळी, पंचायत समितीचे गटविकास अधिकारी प्रशांत शिर्के, आरोग्य अधिकारी डॉ. सचिन खरात, थेऊरच्या मंडलाधिकारी गौरी तेलंग, पोलिस निरीक्षक सूरज बंडगर, लोणी काळभोरच्या सरपंच अश्विनी गायकवाड, उपसरपंच राजाराम काळभोर, राजेंद्र काळभोर, डॉ. दगडू कुंभार, लोणी काळभोरचे ग्रामविकास अधिकारी दत्तात्रेय पवार आदी उपस्थित होते.
पूर्व हवेलीमधील कोणत्याही ग्रामपंचायत हद्दीत लग्नसमारंभासाठी पन्नासपेक्षा जास्त नागरिक एकत्र जमल्यास नवरा-नवरी, कार्यालय मालक व लग्न लावणारे मांत्रिक यांच्यावर कायदेशीर कारवाई करण्याच्या सूचनाही बारवकर यांनी लोणी काळभोर पोलिसांना दिल्या. तसेच, वरील आदेशाचा भंग झाल्यास लग्न कार्यालयाचा परवाना कायमस्वरूपी रद्द करण्यासही मागेपुढे पाहणार नाही.
- सचिन बारवकर, उपविभागीय अधिकारी, हवेली
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.