Pune Traffic : राजकीय पेचानंतर आदित्य ठाकरे अडकले पुण्याच्या वाहतूक कोंडीत

पुणे - पुण्याची वाहतूक कोंडी पुणेकरांसाठी डोकेदुखी ठरत आहे. पाच मिनिटांच्या प्रवासासाठी तासनतास वाहतूक कोंडीत अडकून पडावं लागतं. याच वाहतूक कोंडीचा फटका आता माजीमंत्री आणि युवासेना प्रमुख आदित्य ठाकरे यांनाही बसला आहे. शिवसेना पक्ष आधीच राजकीय कोंडीत असताना आदित्य ठाकरे पुण्याच्या कोंडीत अडकल्याचं चित्र आज पुण्यात पाहायला मिळालं.

आदित्य हे आज पुणे शहराच्या दौऱ्यावर आहेत. त्यांचा ताफा तब्बल वीस ते पंचवीस मिनिट पुण्यातील वाहतूक कोंडीत अडकला होता. वाकडेवाडी परिसरातून आदित्य ठाकरे हे सारसबागेच्या दिशेने जात असताना तब्बल वीस ते पंचवीस मिनिट अडकून पडले होते. शहरात मुसळधार पाऊस आणि त्यात वाहतूक कोंडी यामुळे आदित्य ठाकरे यांना कार्यक्रमाला जाण्यासाठी देखील उशीर झाला.

याआधी मुख्यमंत्री एकनाथ शिंदे यांना देखील वाहतूक कोंडीचा फटका बसला होता. तर केंद्रीयमंत्री नितीन गडकरी यांनी चांदणी चौकाची आणि वाहतूक कोंडीची हवाई पाहणी केली. गुरुवारी चांदणी चौक परिसरातील वाहतूक कोंडीत दोन रुग्णवाहिका अडकून पडल्या होत्या. त्यामुळे या कोंडीवर लवकरात लवकर तोडगा काढवा, अशी मागणी होत आहे.