‘कोरोना’चा प्रादुर्भाव रोखण्यासाठी प्रशासनाने दक्षता घ्यावी : अजित पवार

बारामती : कोरोनाची (Corona) साखळी तोडण्यासाठी आवश्यक त्या सर्व उपाययोजना तातडीने करा, असे निर्देश उपमुख्यमंत्री अजित पवार(Ajit Pawar) यांनी आज दिले. बारामतीच्या विद्या प्रतिष्ठानमध्ये झालेल्या बैठकीत पवार यांनी प्रशासनाला हे निर्देश दिले. या बैठकीत पवार यांनी कोरोना(Corona) प्रतिबंधात्मक उपाययोजना व सध्या उपचार घेत असलेल्या कोरोना(Corona) रूग्णांची माहिती वरिष्ठ वैद्यकीय व प्रशासकीय अधिकाऱ्यांकडून जाणून घेतली. पवार म्हणाले, रुग्णांना योग्य आणि तातडीचे उपचार मिळण्यासाठी आरोग्य विभागाने नियोजन करावे. विनाकारण बाहेर फिरणाऱ्यांवर प्रशासनाने कडक कारवाई करावी, कोणत्याही परिस्थितीत ‘कोरोना’चा प्रादुर्भाव आणखी वाढणार नाही शासनाच्या मदतीपासून कोणीही गरजू वंचित राहणार नाही, याची प्रशासनाने दक्षता घ्यावी.

बारामती तालुक्यातील ‘कोरोना’ची साखळी तोडण्यासाठी लावण्यात आलेल्या निर्बंधांचे नागरिकांनी काटेकोरपणे पालन करून प्रशासनाला सहकार्य करावे. लहान मुलांमधील कोरोना संसर्गाचे प्रमाण लक्षात घेता, त्यांच्यावर उपचार करण्यासाठी योग्य ते नियोजन करावे. ऑक्सिजन व रेमडेसिव्हीरचे नियोजन करण्यासोबतच रूग्णांना वेळवर उपचार मिळणे आवश्यक आहे. संकट काळात शिधापत्रिकाधारकांना अन्नधान्य उपलब्ध होणे आवश्यक आहे, त्यासाठी प्रशासनाने योग्य प्रकारे नियोजन करावे.

''शासनाच्यावतीने देण्यात येणारी मदत आणि शिवभोजन थाळीची सेवा योग्य प्रकारे सुरु ठेवण्यासाठी प्रशासनाने दक्षता घ्यावी. कोणीही गरजू मदतीपासून वंचित राहू नये, याची काळजी घ्यावी. रूग्णालयामध्ये मनुष्यबळाची कमतरता भासणार नाही, याची दक्षता घेण्यात यावी. बारामती येथील महिला रूग्णालयात जनरेटर बसवून घेण्यात यावे. सर्व रूग्णालयामध्ये स्वच्छता ठेवावी असे,'' निर्देश उपमुख्यमंत्री अजित पवार यांनी दिले. यावेळी उपविभागीय अधिकारी दादासाहेब कांबळे यांनी बारामती शहरासह तालुक्यातील कोरोनाची सद्यस्थिती व कोरोना आटोक्यात आणण्यासाठी करण्यात येत असलेल्या उपाययोजनाबाबतची माहिती दिली.