पुण्यात आज चार केंद्रांवर देणार कोव्हॅक्सिन लस

पुणे : राज्य सरकारकडून शहराला शुक्रवारी नव्याने कोविशिल्ड लसींचा पुरवठा झाला नाही. त्यामुळे ४५ वर्षावरील नागरिकांचे लसीकरण शनिवारी बंद राहणार आहे. तर १८ ते ४४ वयोगटातील नोंदणी केलेल्या नागरिकांना मात्र पहिला डोस दिला जाणार आहे. तो ही सहा ऐवजी चार केंद्रांवर मिळणार आहे. या केंद्रांवर कोव्हॅक्सिन लस देण्यात येणार आहे.
दरम्यान, शुक्रवारी पुणे महापालिका हद्दीत लसीकरणाचे ८० टक्केच उद्दिष्ट पूर्ण झाले असून, ठरवलेल्या १९ हजार ४०० लसीकरणाऐवजी १५ हजार ५८६ जणांनाच लस देण्यात आली. महापालिकेकडून काही लसीकरण केंद्रांना शनिवारी, तर काही केंद्रांना रविवारी सुटी देण्यात येते.

गेल्या मंगळवारी आणि गुरुवारी राज्य सरकारकडून महापालिकेला लसींचा पुरवठा झाला होता. त्यातून ४५ वयोगटावरील दुसरा डोस घेणाऱ्या नागरिकांसाठी ७ मेपर्यंतचे नियोजन महापालिकेकडून करण्यात आले होते. दरम्यान, आज शहराला नवीन डोस उपलब्ध होऊ शकले नाहीत. त्यामुळे नोंदणी न झालेले, तसेच नोंदणी झालेल्या ४५ वयोगटावरील कोणत्याही नागरिकांचे उद्या लसीकरण होणार नसल्याचे महापालिकेने कळवले आहे.

ही चार केंद्र सुरू राहणार (१८ ते ४४ वयोगटासाठी )
१) अण्णासाहेब मगर हॉस्पिटल, हडपसर
२)जयाबाई सुतार दवाखाना, कोथरूड
३) मुरलीधर लायगुडे हॉस्पिटल, धायरी
४) ससून हॉस्पिटल, स्टेशन रोड

पुण्याच्या ताज्या बातम्या वाचण्यासाठी येथे क्लिक करा