चक्क बोकड-शेळीचे लग्न लावून केले आंदोलन!

उंडवडी : जनाई शिरसाईचे उपसा सिंचन योजनेचे पाणी बारामतीच्या दुष्काळी भागाला मिळावे, या मागणीसाठी सुरु असलेल्या उंडवडी कडेपठार ( ता. बारामती) येथील आंदोलनात आज चौथ्या दिवशी बोकड व शेळीचे मोठ्या थाटामाटात लग्न लावून सरकारचा निषेध करण्यात आला. यावेळी जमा करण्यात आलेले आहेर (निधी) 687रुपये सरकारला पाठवण्यात येणार आहे. 

उंडवडी कडेपठार ( ता. बारामती) येथील चक्री उपोषण आणि वेगवेगळ्या पद्धतीच्या आंदोलनाचा चौथा दिवस आहे. सरकार आंदोलनाची दखल घेत नाही. म्हणून आज येथील आंदोलनकर्त्यानी शेळी आणि बोकड यांचा शुभविवाह लावून आगळेवेगळे आंदोलन केले. 

अगदी ग्रामीण भागात जसा एकदा लग्नसोहळा पार पडतो. तशाच पद्धतीने हा शेळी-बोकडाचा विवाहसोहळा पार पडला. यावेळी जमलेल्या लोकांना शेळी-बोकडाच्या लग्नासाठी अक्षदा वाटप करण्यात आला. बोकड आणि शेळीला बाशिंग आणि मंडवळ्या बांधून दोघांमध्ये (धोती) आंतरपाठ धरुन खास शैलीत मंगलाष्टक गायन केले.

यावेळी जिल्हा परिषदेचे सदस्य भरत खैरे, सरपंच विशाल कोकरे, कल्पना साळुंके, उपसरपंच पोपट गवळी, दूध संघाके संचालक संजय गाडेकर, वैशाली साळुंके, माजी सरपंच विठ्ठल जराड , बापूराव गवळी आदींसह महिला ग्रामस्थ व पदाधिकारी मोठ्या संख्येने उपस्थित होते. 

सरकार जाणून-बुजून बारामतीच्या जिरायती भागातील पाणी प्रश्नाकडे आणि जनाई शिरसाई योजनेचे पाणी सोडत नाही आणि आंदोलनाकडेही दुर्लक्ष करत आहे. त्यामुळे निषेध म्हणून आंदोलनकर्त्यानी आज या मुक्या प्राण्यांचे लग्न लावून निषेध केला.

तसेच यावेळी बोकड आणि शेळीच्या लग्नात ग्रामस्थांनी केलेले पैसेरुपी आहेर (687 रुपये) पुण्याचे पालकमंत्री गिरीश बापट यांना पाठवण्यात येणार आहेत. जोपर्यंत योजनेचे पाणी सोडण्यात येत नाही, तोपर्यंत आंदोलन सुरुच ठेवणार आहे. आंदोलन आणखी तीव्र करणार आहे, अशी माहिती उपोषणकर्ते सतिश जराड व गजानन सरक यांनी दिली.