२०० कोटींचा प्रकल्प ३१० कोटींवर गेला, १०० कोटी शिवसेना-भाजपला; सिंचन घोटाळ्यावर अजितदादांचा गौप्यस्फोट

राष्ट्रवादी काँग्रेसचे अध्यक्ष आणि राज्याचे उपमुख्यमंत्री अजित पवार यांच्यावर भाजपने ७० हजार कोटींच्या सिंचन घोटाळ्याचे आरोप केले होते. हे आरोप करताना देवेंद्र फडणवीस यांनी बैलगाडीभर पुरावे असल्याचंही म्हटलं होतं. भाजपने अनेकदा अजित पवार यांना सिंचन घोटाळ्यावरून घेरलंय. दरम्यान, आता महापालिका निवडणुकीच्या प्रचारावेळी अजित पवार यांनी सिंचन घोटाळ्यावरून खळबळजनक दावा केलाय. राज्यात १९९९ ला राष्ट्रवादीची सत्ता आली पण त्याआधीच्या सरकारनेच सिंचन प्रकल्पाची किंमत वाढवली असा आऱोप अजित पवार यांनी केला आहे.