खंडोबा भक्तांनो, सोमवती यात्रेबाबत घेतलाय हा निर्णय 

जेजुरी (पुणे) : श्री क्षेत्र जेजुरी येथे येत्या सोमवारी (ता. २०) भरणारी खंडोबाची भर सोमवती यात्राही कोरोनाच्या प्रादुर्भामुळे रद्द करण्यात आली आहे. ग्रामस्थ,
मानकरी व देवसंस्थान यांच्या बैठकीत हा निर्णय घेण्यात आला. मात्र, नित्य सेवेकरी, मानकरी यांच्या हस्ते सोमवती स्नानाचे सर्व धार्मिक विधी होणार आहेत.
त्यासाठी उत्सवमूर्ती थेट मोटारीतून नदीवर घेऊन येणार आहेत. 

पुणेकरांनी एक महिना रोखली अपेक्षित रुग्णवाढ

सोमवारी अमावस्या आली की जेजुरीत खंडोबाची सोमवती यात्रा भरते. सोमवारी दिवसभर अमावस्या असल्याने भर सोमवती यात्रेचा योग आहे. मात्र, जेजुरी हे प्रतिबंधीत क्षेत्र असल्याने भरसोमवती असूनही यात्रा रद्द करण्याचा निर्णय ग्रामस्थ मंडळाच्या बैठकीत घेण्यात आला. धार्मिक विधी व नियोजनाबाबत जेजुरीत बैठक घेण्यात आली. या वेळी राजेंद्र पेशवे, सचिन पेशवे, गणेश आगलावे, छबन कुदळे, जालिंदर खोमणे, रामदास माळवदकर, संजय खोमणे, कृष्णा कुदळे, आबा राऊत, अमोल शिंदे, दिलावर मनेर, नंदू मोरे, काशिनाथ मोरे, अविनाश सातभाई, कुंडलिक दावलकर, सुधीर गोडसे, प्रमुख विश्वस्त संदीप जगताप, विश्वस्त शिवराज झगडे, पंकज निकुडे, सहायक पोलिस निरिक्षक अंकुश माने आदी उपस्थित होते.   

पुण्यात पीएमपी वाहतूक सुरू करण्याबाबत महत्त्वाचा आदेश
 
परंपरेनुसार सोमवतीच्या कऱ्हा स्नानासाठी प्रस्थान मात्र होणार आहे. प्रमुख सेवेकरी मानकरी यांच्या हस्ते सर्व धार्मिक विधी होणार आहेत. सोमवारी उत्सवमूर्ती मोटारीतून कऱ्हा नदीवर घेऊन जाणार आहेत. नदी तीरावर सुरक्षित अंतर ठेवून उत्सव मूर्तींना अभिषेक व स्नान घालण्यात येईल. वाहनातूनच उत्सवमूर्तींना आणण्यात येणार आहे. सोमवती नंतर ग्रामस्थ, मानकरी यांना देण्यात येणारा रोजमुराचे (धान्य) या वेळी घरपोच वाटप करण्यात येणार आहे. 

पुण्याच्या इतर बातम्या वाचण्यासाठी येथे क्लिक करा

सोमवती अमावस्या उत्सवातील धार्मिक विधींसाठी परवानगी घेण्यात येणार आहे, असेही राजेंद्र पेशवे यांनी सांगितले. प्रशासन व्यवस्थेकडून ज्या सुचनेनुसार व नियम पाळून धार्मिक विधी पार पाडले जातील असल्याचे ग्रामस्थ मंडळाचे अध्यक्ष गणेश आगलावे यांनी सांगितले. धार्मिक विधीसाठी लागणाऱ्या सर्व सोयी सुविधा देवसंस्थानच्यावतीने पुरविण्यात येणार असल्याचे प्रमुख विश्वस्त संदीप जगताप यांनी सांगितले.

भाविकांनी येण्याचा प्रयत्न करू नये
सोमवती यात्रेला नित्य नियमाने येणाऱ्या भाविकांनी या वेळी जेजुरीत येण्याचा प्रयत्न करू नये. जेजुरी हे कोरोनामुळे प्रतिबंधीत क्षेत्र असल्याने अत्यावश्यक सेवा वगळता सर्व व्यवहार बंद आहेत. मंदिरही बंद असून गडाकडे जाणारे सर्व रस्ते बंद आहेत. त्यामुळे सोमवती यात्रेनिमित्त भाविकांनी शहरात येण्याचा प्रयत्न करून नये, अन्यथा कायदेशीर कारवाई करण्यात येईल, असे सहायक पोलिस निरीक्षक अंकुश माने यांनी सांगितले.

Edited by : Nilesh Shende