इंदापूरात पहिल्याच दिवशी २८ हजार विद्यार्थ्यांची हजेरी

वालचंदनगर : इंदापूर तालुक्यातील इयत्ता ५ ते १२ वी पर्यंतच्या १५७ शाळा सुरु झाली असून, पहिल्याच दिवशी २८ हजार २९२ विद्यार्थ्यांनी हजेरी लावली. कोरोना व लॉकडाउन नंतर आज सुमारे १८ महिन्यानंतर इयत्ता पाचवीच्या शाळा सुरु झाल्या आहेत. शाळा सुरु होण्यापूर्वी शाळा सॅनिटायझरमध्ये फवारणी करण्यात आली होती.

अनेक महिन्यानंतर शाळेमध्ये प्रवेश केल्यानंतर विद्यार्थ्यांच्या चेहऱ्यावरती आनंद गगणात मावेनासा झाला होता. शाळेच्या गेटवरती प्रवेश करताच मुला-मुलींचे गुलाबपुष्प देवून स्वागत करण्यात आले. काही ठिकाणी विद्यार्थ्यांना फुगे देण्यात आले होते. विद्यार्थ्यांच्या रक्तातील ऑक्सिजन व तपमान मोजण्यात आहे. वालचंदनगरमधील वर्धमान विद्यालयामध्ये शाळेचे मुख्याध्यापक हनुमंत कुंभार यांनी विद्यार्थ्यांचे स्वागत केले.

इंदापूरात पहिल्याच दिवशी ५३ टक्के हजेरी...

इंदापूर तालुक्यामध्ये इयत्ता पाचवी ते बारावीपर्यंतच्या १५७ शाळा असून ५२८३९ विद्यार्थी आहेत. यातीन २८२९२ विद्यार्थ्यांनी हजेरी लावली असल्याची माहिती प्रभारी गटशिक्षणधिकारी राजकुमार बामणे यांनी दिली.