Pune Crime: महिलांनी मारलं म्हणून अपमान झाला अन् "त्याने" खाणीत उडी मारून दिला जीव

पुण्यातील धानोरी भागात दोन दिवसांपूर्वी खाणीमध्ये एका व्यक्तीने उडी मारल्याची घटना घडली होती. त्याचं कारण आता समोर आलं आहे. अजय टिंगरे (४२) असे आत्महत्या केलेल्या व्यक्तीचे नाव आहे. याप्रकरणी त्यांची पत्नी यांनी विश्रांतवाडी पोलीस ठाण्यात फिर्याद दिली आहे. यानुसार पोलिसांनी नवनाथ हनुमंत टिंगरे यासह ४ जणांवर गुन्हा दाखल केला आहे.

मिळालेल्या माहितीनुसार, अजय हा रिक्षा चालक होता. २३ मार्च रोजी रात्री अजय हा दारू पिऊन घरी आला आणि त्याने घरासमोरच शिवीगाळ करायला सुरुवात केली. बायकोने समजल्यानंतर तो घरात येऊन झोपला पण दुसऱ्या दिवशी सकाळी शेजारचे जबरदस्तीने त्याच्या घरात शिरले, तो झोपेत असतानाचा त्याला मारत घराबाहेर आणले. अजय याच्या बायकोने त्यांना मारू नका अशी विनंती केली.

यानंतर अजय त्याची रिक्षा घेऊन निघून गेला. त्याच्या डोक्यात गावातील महिलांनी मारहाण केल्यामुळे अपमान झाला आहे. याचा राग त्याच्या मनात होता. त्या रागाच्या भरात त्याने विश्रांतवाडी धानोरी रस्त्यावरील खाणीत उडी मारली आणि जीवन संपवले.