"पुणेकरांना भामा-आसखेडचे पाणी देण्यास भाजप कटिबद्ध"

सकाळ वृत्तसेवा
Tuesday, 22 September 2020

या प्रकल्पाचे पाणी पुणेकरांना  देण्यास भाजप कटिबद्ध असल्याचे  भाजपचे शहराध्यक्ष जगदीश मुळीक यांनी प्रसिद्धीस दिलेल्या  पत्रकात म्हटले आहे. 

पुणे, ता. २१ : राज्यात भाजपप्रणित महायुतीची सत्ता असतानाच्या काळात   भामा-आसखेड पाणी प्रकल्पाचे ९५ टक्के काम पूर्ण करण्यात आले आहे. या प्रकल्पाचे पाणी पुणेकरांना  देण्यास भाजप कटिबद्ध असल्याचे  भाजपचे शहराध्यक्ष जगदीश मुळीक यांनी प्रसिद्धीस दिलेल्या  पत्रकात म्हटले आहे. 

राष्ट्रवादी कॉंग्रेसमधील अंतर्गत वादामुळे ही योजना पूर्ण होण्यास विलंब होत आहे. गेल्या वर्षभरात उर्वरीत ५ टक्के काम करण्यासही सरकारला अपयश आल्याची टीकाही त्यांनी यावेळी केली. 

हेही वाचा - पुण्यात रेमडेसिव्हिरचा काळा बाजार

मुळीक म्हणाले, "राष्ट्रवादीचे खेडचे आमदार दिलीप मोहिते यांनी नुकतेच पुणे आणि पिंपरीला भामा-आसखेडचे पाणी देणार नाही, असे वक्तव्य केले आहे. मुळात या योजनेबाबत राष्ट्रवादी कॉंग्रेस पक्षात एकवाक्यता नाही. स्थानिक आमदार केवळ बैठका घेण्याचा फार्स करत आहेत. प्रत्यक्षात प्रकल्प पूर्ण करण्यासाठी कोणतीही ठोस पावले उचलली जात नाहीत.
आत्तापर्यंत पुणे-नगर रस्त्यावरील नागरिकांना भामा-आसखेडचे पाणी मिळाले असते. परंतु नियोजनाचा अभाव आणि स्थानिक आमदारांच्या राजकीय उदासिनतेमुळे प्रकल्प पूर्ण करण्यात अपयश आले आहे."

हेही वाचा - कोरोना चाचण्यांमध्ये जिल्ह्यात निम्म्याने घट; 76 जणांचा मृत्यू

पुणे शहरांतील वडगावशेरी, चंदननगर, कळस, धानोरी, विश्रांतवाडी, येरवडा या शहराच्या पूर्व भागातील पाणीप्रश्‍न सोडविण्यासाठी मागील  सात वर्षांपासून भामा-आसखेडचे योजनेचे काम सुरू आहे. यासाठी सुमारे ४१८ कोटी रुपयांचा खर्च येत आहे. महापालिकेत भाजपची सत्ता आल्यानंतर योजनेला आवश्यक असणारा महापालिकेच्या वाट्याचा निधी उपलब्ध करून दिला असल्याचे त्यांनी या पत्रकात नमूद केले आहे.


स्पष्ट, नेमक्या आणि विश्वासार्ह बातम्या वाचण्यासाठी 'सकाळ'चे मोबाईल अॅप डाऊनलोड करा
Web Title: Bhama Askhed Water To Pune City BJP