Pune Crime : कामावरून काढल्याच्या रागातून कामगाराचा खून; पुण्यातील शिरूर येथील धक्कादायक घटना

शिरूर : प्लॅस्टर ऑफ पॅरिस चे काम करणाऱ्या कामगाराने कामावरून काढून टाकल्याच्या रागातून या कामाची पाहणी करणाऱ्याचा कुऱ्हाडीचे घाव घालून खून केला. खून करून तो पळून गेला होता. तथापि, शिरूर पोलिसांनी स्थानिक तरूणांच्या मदतीने त्याला बेड्या ठोकल्या. गुरूवारी (ता. २४) रात्री उशिरा वडनेर खुर्द (ता. शिरूर) येथे हा खूनाचा प्रकार घडला तर रात्री उशिरा खूनी तरूणाला पोलिसांनी जेरबंद केले.

आत्ताउल्ला उर्फ मोईन शाबीर खान (वय २४, रा. चेंबूर, मुंबई) असे खून झालेल्या तरूणाचे नाव असून, त्याच्या खूनप्रकरणी शाहिद रफीक बागवान (रा. जाम मोहल्ला, भुसावळ रेल्वे स्टेशन, भुसावळ, जि. जळगाव) याला आज अटक करण्यात आली.

त्यास शिरूर न्यायालयाने मंगळवार (ता. २८) पर्यंत पोलिस कोठडी सुनावली. पोलिसांनी दिलेल्या माहितीनूसार, वडनेर - फाकटे रोडवर वडनेर येथे जाकीर गफार सय्यद यांचे फार्म हाऊस असून, त्यांचाच नातेवाईक असलेला आत्ताऊल्ला खान हा तेथे वास्तव्यास राहून फार्म हाऊसवरील कामे पाहात होता.

संशयित आरोपी शाहिद बागवान हा त्याच्याकडे कामासाठी म्हणून आल्याने तेथेच वास्तव्यास होता. दरम्यान, कामावरून काढून टाकल्याचा राग आल्याने त्याने आत्ताऊल्ला खान याच्यावर कुऱ्हाडीने वार केले.

काल रात्री सातच्या सुमारास ही घटना घडली. आत्ताउल्ला याचा खून केल्यानंतर फार्महाऊसमधील खोल्यांना बाहेरून कड्या लावून शाहिद बागवान पळून गेला. तथापि, तेथील इतर कामगारांना संशय आल्याने त्यांनी एका खोलीचे दार उघडून पाहिले असता खूनाचा प्रकार उघडकीस आला.

याबाबत माहिती समजताच शिरूर चे पोलिस निरीक्षक संजय जगताप, सहायक पोलिस निरीक्षक अमोल पन्हाळकर, पोलिस उपनिरीक्षक सुनिल उगले व एकनाथ पाटील, पोलिस हवालदार प्रफुल्ल भगत,

नितीन सुद्रीक, पोलिस नाईक नीलेश शिंदे व विनोद मोरे, कॉन्स्टेबल दिपक पवार यांनी दोन पथके तयार करून संशयित शाहिद बागवान याचा ठावठिकाणा शोधण्यास सुरवात केली. त्याचा फोटो सोशल मिडीयावर व्हायरल केला.

पोलिस पाटील राहुल जगताप, पोलिस मित्र दिपक घोडे व आकाश येवले यांनीही स्थानिक तरूणांना जागृत करून संशयित आरोपीबाबत माहिती दिली. काल रात्री उशिरा त्याला जांबूत (ता. शिरूर) येथील बाजारतळावरून ताब्यात घेतले. संशयित शाहिद बागवान याने खूनाची कबूली दिली असल्याची माहिती या प्रकरणाचा तपास करणारे सहायक पोलिस निरीक्षक पन्हाळकर यांनी दिली.