Accident : अपघातात संगणक अभियंता युवतीचा मृत्यू

पुणे - ॲपद्वारे रस्ता शोधत दुचाकीवरून जाताना ट्रकने धडक दिल्यामुळे एका संगणक अभियंता युवतीचा मृत्यू झाला. ही घटना मुंबई-बंगळूर बाह्यवळण मार्गावर घडली.

रिदा इम्तियाज मुकादम (वय २३, रा. खराडी) असे मृत युवतीचे नाव आहे. अपघातात दुचाकीस्वार नटराज अनिलकुमार (वय ३०, रा. वानवडी) हा जखमी झाला आहे. रिदा आणि नटराज हे दोघे खराडीतील एका आयटी कंपनीत संगणक अभियंता आहेत.

ते ॲपद्वारे मार्ग शोधून वानवडीला जात होते. परंतु ॲपवर त्यांना मुंबई-बंगळूर बाह्यवळण मार्ग दाखविला. ते त्या दिशेने जात असताना चुकून नवीन कात्रज बोगद्याकडे गेले. खेड शिवापूरकडे जात असल्याचे लक्षात आल्यानंतर नटराजने नवीन कात्रज बोगद्याजवळून दुचाकी वळवली. त्या वेळी भरधाव ट्रकने दुचाकीला धडक दिली. त्यात रिदाच्या डोक्याला गंभीर दुखापत झाल्यामुळे तिचा मृत्यू झाला. याबाबत भारती विद्यापीठ पोलिस ठाण्यात गुन्हा दाखल केला आहे. अपघातानंतर ट्रकचालक पसार झाला आहे.