लिपिक पदे एमपीएससीद्वारे भरण्याचा विचार 

वालचंदनगर (पुणे) : राज्यातील सरकारी विभागांची सर्व लिपिक संवर्गातील पदे महाराष्ट्र लोकसेवा आयोगाच्या माध्यमातून भरण्याच्या अनुषंगाने सकारात्मक विचार करण्यात येणार असल्याची माहिती सामान्य प्रशासन विभागाचे राज्यमंत्री दत्तात्रेय भरणे यांनी दिली. 

- ताज्या बातम्यांसाठी डाऊनलोड करा ई-सकाळचे ऍप

- पुण्याच्या बातम्या वाचण्यासाठी येथे ► क्लिक करा

महाराष्ट्र लोकसेवा आयोगाशी (एमपीएससी) निगडित बाबींची आढावा बैठक राज्यमंत्री भरणे यांच्या अध्यक्षतेखाली मंत्रालयात मंगळवारी झाली. आमदार रोहित पवार यांनी एमपीएससी देणाऱ्या उमेदवारांच्या अनुषंगाने बैठकीच्या आयोजनाबाबत मागणी केली होती. बैठकीस आमदार रोहित पवार, संजय शिंदे, अतुल बेनके यांच्यासह सामान्य प्रशासन विभागाचे उपसचिव राहुल कुलकर्णी, गीता कुलकर्णी, सु. मो. महाडीक, महाराष्ट्र लोकसेवा आयोगाचे सहसचिव सु. ह. अवताडे उपस्थित होते. 

एमपीएससी परीक्षा पुढे ढकलावी; कोणी केली मागणी?

भरणे यांनी सांगितले की, महाराष्ट्र लोकसेवा आयोगातर्फे गट अ आणि ब संवर्गासाठी, पोलिस उपनिरीक्षक, सहायक कक्ष अधिकारी, राज्य कर निरीक्षक आदी काही गट क मधील पदांसाठी तसेच बृहन्मुंबईतील लिपिक संवर्गासाठीही एमपीएससीमार्फत भरती प्रक्रिया राबण्यिात येते. तथापि, राज्यातील उर्वरित जिल्ह्यात बहुतांश गट ब अराजपत्रित आणि गट क मधील पदांची भरती प्रक्रिया स्थानिक पातळीवर होते. त्यामुळे उमेदवारांना प्रत्येक वेळी नव्याने अर्ज करावा लागल्याने खर्च वाढतो. एमपीएससीच्या माध्यमातून केंद्रीकृत पद्धतीने एकाच वेळी या पदांसाठी भरती प्रक्रिया राबविण्याची मागणी उमेदवारांकडून होत आहे. त्या अनुषंगाने राज्य सरकारच्या सर्वच गट ब आणि गट क संवर्गातील पदांची भरती एमपीएससीच्या माध्यमातून राबविता येईल काय, याबाबत चाचपणी करण्यात येईल. 

डेक्कन कॉलेजकडे 'मॉडल' विद्यापीठ म्हणून पहावे : डॉ. भूषण पटवर्धन

प्रायोगिक तत्त्वावर सुरुवातीला लिपिक संवर्गासाठी एमपीएससीच्या माध्यमातून भरती प्रक्रिया राबविण्याबाबत सकारात्मक विचार करण्यात येईल. त्यामुळे उमेदवारांना वेगवेगळ्या विभागांच्या परीक्षेसाठी प्रत्येक वेळी नव्याने अर्ज करण्याची गरज भासणार नाही. यामुळे उमेदवारांचा वेळ, पैसा आणि मानसिक तसेच शारीरिक त्रास वाचण्यास मदत होणार आहे. 
- दत्तात्रेय भरणे, राज्यमंत्री, सामान्य प्रशासन 

 
"नियुक्ती प्रक्रिया लवकर पूर्ण करावी' 
एमपीएससीच्या सदस्य नियुक्तीसाठी अर्ज प्राप्त झाले असून त्याची छाननी आणि नियुक्ती प्रक्रिया लवकरात लवकर पूर्ण करावी. तसेच 
एमपीएससीमार्फत घेण्यात आलेल्या विविध परीक्षांमध्ये पात्र ठरलेल्या उमेदवारांची मुलाखत प्रक्रिया गतीने पार पाडण्यासाठी सदस्यांची सर्व पदे लवकरात लवकर भरणे आवश्‍यक असल्याचे दत्तात्रेय भरणे यांनी सांगितले.