आदिवासींसाठी वसतिगृहाचे वरदान

मंचर - सकाळ रिलीफ फंडाच्या वतीने घोडेगाव (ता. आंबेगाव) येथे आदिवासी मुलांच्या शिक्षणासाठी सुमारे एक कोटी रुपये खर्चाच्या माळीण वसतिगृहाचे बांधकाम सुरू आहे. आतापर्यंत ४० टक्के बांधकाम झाले असून, मे २०१९ अखेर सर्व काम पूर्ण होईल. जूनमध्ये इयत्ता पाचवी ते दहावीच्या वर्गांत शिक्षण घेत असलेल्या गरीब व गरजू मुलांच्या निवासाची सोय होणार आहे.  

सकाळचे मोबाईल अॅप्लिकेशन डाऊनलोड करण्यासाठी क्लिक करा

माळीण (ता. आंबेगाव) येथे ता. ३० जुलै २०१४ रोजी निसर्गाचा कोप झाल्याने डोंगर कोसळला. संपूर्ण गावठाण उद्‌ध्वस्त होऊन १५१ जणांचा मृत्यू झाला. या दुर्घटनाग्रस्त गावासाठी ‘सकाळ रिलीफ फंडा’ने नागरिकांना मदतीचे आवाहन केले होते. त्यानुसार जमा झालेल्या निधीतून आदिवासी मुलांसाठी वसतिगृह बांधण्याचा निर्णय घेण्यात आला. आंबेगाव तालुक्‍यातील मुलांना शिक्षणासाठी घोडेगावला ये-जा करावी लागते; पण त्यांच्यासाठी वसतिगृह नसल्याने अनेक मुले शिक्षणापासून वंचित राहात होती. वसतिगृह बांधकामासाठी जागेची नितांत गरज होती. घोडेगाव येथील ‘आंबेगाव तालुका विद्या विकास मंडळ’ या शिक्षण संस्थेने वसतिगृह बांधकामासाठी जागा विनामूल्य उपलब्ध करून दिली. एकूण ७ हजार चौरस फूट क्षेत्रफळाची दुमजली इमारत येथे होणार आहे. हे वसतिगृह आदिवासी मुलांना शिक्षणासाठी वरदान ठरणार आहे.

तळमजला व पहिला मजला, अशी वसतिगृहाची इमारत आहे. तळमजल्यावर डायनिंग हॉल, किचन, लाँड्री, अधीक्षक निवास, अपंग विद्यार्थ्यांसाठी खोली, अशी व्यवस्था असेल. पहिल्या मजल्यावर दहा खोल्या असतील. प्रत्येक खोलीत सहा विद्यार्थ्यांच्या निवासाची सोय करण्यात येईल.
- सतीश कांबळे, वास्तुविशारद, पुणे

 शिक्षण घेण्यासाठी अनेक आदिवासी मुले इच्छुक असतात; पण त्यांची निवासाची व्यवस्था होत नाही. त्यामुळे घोडेगाव येथे आदिवासी मुलांसाठी वसतिगृह व्हावे, असा आमच्या संस्थेचा प्रयत्न होता. पण संस्थेकडे आर्थिक पाठबळ नव्हते. ‘सकाळ रिलीफ फंडा’ने केलेल्या सहकार्यामुळे वसतिगृहाचे बांधकाम सुरू झाले आहे. कामाचा दर्जाही चांगला आहे. मे २०१९ पर्यंत काम पूर्ण होऊन आदिवासी कुटुंबांतील गरजू मुलांना जूनमध्ये शिक्षणासाठी प्रवेश देता येईल.  
- अजित काळे, अध्यक्ष, आंबेगाव तालुका विद्या विकास मंडळ, घोडेगाव