पुण्यातील रेड लाइट एरियातही कोरोनाने केली एन्ट्री; 'इतक्या' जणांचे रिपोर्ट आले पॉझिटिव्ह

पुणे : महापालिका आणि पोलिस प्रशासनाचे चोख नियोजन आणि वेश्या व्यवसाय करणाऱ्या महिलांनी पाळलेली स्वयंशिस्त यामुळे आतापर्यंत शहरातील रेड लाइट एरियात कोविड-19 चा फैलाव होण्यापासून थांबवण्यात यश आले होते. मात्र, आता बुधवार पेठेतील वेश्या व्यवसाय परिसरातही कोरोनाने शिरकाव केला आहे. तेथील दोन महिला आणि तीन पुरुषांची कोरोना टेस्ट शनिवारी (ता.२५) संध्याकाळी पॉझिटिव्ह आली आहे.

- सुशांत सिंग आत्महत्या प्रकरणी गृहमंत्र्यांनी दिले मोठे संकेत; आणखी तिघांची होणार चौकशी!​

या दोन्ही महिला वेश्या व्यवसाय करतात, तर पुरुष त्याच भागात राहणारे असून ते फेरीवाले आहेत. गेले चार महिने या ठिकाणी कोरोनाचा एकही रुग्ण आढळला नव्हता. अनलॉकच्या पहिल्या टप्प्यात येथील निर्बंध कमी करण्यात आले होते. त्यामुळे येथील जीवनमान सुरळीत सुरू झाले होते. तर महिलांच्या रोजीरोटीचा प्रश्न सुटला होता. मात्र, आता याठिकाणी कोरोनाचा शिरकाव झाल्याने रेड लाईट एरिया पुन्हा बंद केला, तर आम्हाला मिळणाऱ्या उत्पन्नाचं काय होईल? असा प्रश्न येथील महिलांना पडला आहे .

मार्चमध्ये संचारबंदी लागू झाल्यावर खबरदारीचा उपाय म्हणून हा भाग पत्रे लावून सील करण्यात आला होता. या काळात रेड लाईट भागातील महिलांनी पोलिसांना आणि येथील मंडळाच्या कार्यकर्त्याना सहकार्य केले. तेथील महिलांची कुठल्याही प्रकारे गैरसोय होऊ नये म्हणून त्यांना अनेक सामाजिक संस्थांच्या माध्यमातून दूध, भाजीपाला आणि इतर जीवनावश्यक वस्तूंचा पुरवठा करण्यात आला.

- Fight With Corona : प्लाझ्मा दान करून त्यांनी ५८ जणांना दिले जीवदान!​

एक महिला चार महिन्यांची गर्भवती :
अहवाल पॉझिटिव्ह आलेल्या दोन्ही महिलांचे वय ३५ च्या घरात आहे. सुदैवाने त्यांना कोणतेही आजार नाहीत. मात्र त्यातील एक महिला ही चार महिन्यांची गर्भवती आहे. त्यामुळे किमान तिला तरी अॅडमिट करून घेऊन तिच्यावर उपचार करणे गरजेचे आहे, असे 'कायाकल्प'च्या प्रकल्प प्रमुख सारिका लष्करे यांनी सांगितले.

लक्षणे आढळून आल्याने आम्ही या पाचही जणांना नायडू रुग्णालयात पाठवले होते. त्याची टेस्ट पॉझिटिव्ह आल्याने डॉक्टरांनी त्यांना होम क्वॉरंटाइन होण्याचा सल्ला दिला आहे. मात्र या सर्वांची घरे खूप छोटी आहेत. कुटुंबातील इतर व्यक्ती तिथे राहतात. त्यामुळे या सर्वांच्या उपचारासाठी प्रशासनाने रेड लाईट एरियातच कोविड केअर केंद्राची उभारणी करायला हवी. तसेच येथील सर्वांची टेस्ट करावी. 
- सारिका लष्करे, प्रकल्प प्रमुख, कायाकल्प

- पुण्याच्या बातम्या वाचण्यासाठी येथे ► क्लिक करा

(Edited by : Ashish N. Kadam)