युवकाच्या खूनप्रकरणी अल्पवयीन मुले ताब्यात

पुणे : सिंहगड रस्ता परिसरातील युवकाच्या खूनप्रकरणी सिंहगड पोलिसांनी तीन अल्पवयीन मुलांना ताब्यात घेतले. दारू पिताना पैसे घेण्याच्या कारणामुळे झालेल्या वादातून खून करण्यात आला असल्याची माहिती प्राथमिक चौकशीत पुढे आली आहे.

हरी ऊर्फ गुड्ड्या असे खून झालेल्या युवकाचे नाव आहे. मंगळवारी (ता. 15) सिंहगड रस्त्यावरील फनटाइम चित्रपटगृहाजवळील बंदिस्त पाइपलाइनमध्ये हरीचा मृतदेह आढळला होता. या प्रकरणाचा तपास सिंहगड पोलिसांकडून सुरू होता. त्या वेळी मृत व्यक्ती व त्याच्यासमवेत तिघे जण दारू पिण्यासाठी एकत्र आले असल्याची माहिती पोलिसांना मिळाली. त्यानुसार पोलिसांनी संबंधित तिन्ही अल्पवयीन मुलांना ताब्यात घेऊन, त्यांच्याकडे चौकशी केली. त्या वेळी तिघांनीच खून केल्याची कबुली दिली. मंगळवारी तिघे जण घटनास्थळी दारू पीत होते. त्या वेळी हरी तेथे दारू पिण्यासाठी आला. त्यांच्यापैकी एकास त्याने दारू आणण्यासाठी पैसे दिले. त्यानुसार एकाने दारू आणून दिली; परंतु उरलेले पैसे परत न दिल्याच्या कारणावरून त्यांच्यात भांडणे झाली. त्या वेळी तिघांनी हरीच्या डोक्‍यात दगड घालून त्याचा खून केला.

पोलिस निरीक्षक सरदार पाटील यांच्या मार्गदर्शनाखाली सहायक पोलिस निरीक्षक गडकरी, पोलिस उपनिरीक्षक गिरीश सोनवणे, पोलिस कर्मचारी दत्ता सोनवणे, दयानंद तेलंगे पाटील, योगेश झेंडे आदींच्या पथकाने ही कारवाई केली.