राष्ट्रवादीच्या नेतेमंडळींना चमकण्याची हौसच भारी! 

दौंड (पुणे) : दौंड रेल्वे स्थानकावर उत्तर प्रदेशकडे जाणाऱ्या श्रमिक एक्‍सप्रेससाठी मजुरांनी शारीरिक अंतर राखण्याचा नियम काटेकोरपणे पाळला. परंतु, मजुरांना निरोप देण्यासाठी आलेल्या राष्ट्रवादी कॉंग्रेस पक्षाच्या पदाधिकाऱ्यांनी शारीरिक अंतर न पाळता गर्दी केली. 

यूपीला निघालेलं जोडपं म्हणतंय, "हालात सामान्य हुए तो लौटेंगे...'  

खासदार सुप्रिया सुळे यांच्या पुढाकाराने दौंड रेल्वे स्थानकावरून आज (ता. 21) कुरकुंभ एमआयडीसी व दौंड तालुक्‍यातील 1101 मजुरांना घेऊन विशेष श्रमिक एक्‍सप्रेसने उत्तर प्रदेशमधील मुजफ्फरनगरकडे रवाना झाली. तहसीलदार संजय पाटील, गट विकास अधिकारी गणेश मोरे, नगरपालिकेचे मुख्याधिकारी मंगेश शिंदे व दौंड पोलिसांनी श्रमिक एक्‍सप्रेसने जाणाऱ्या मजुरांसाठी तालुक्‍यातून रेल्वे स्थानकापर्यंत खास बसगाड्यांची व्यवस्था केली होती. 

बारामतीकरांनो, खरेदीचे प्लॅन करताय? आता या आहेत अटी...  

रेल्वे स्थानक परिसर ते फलाट क्रमांक सहापर्यंत शारीरिक अंतर राखण्यासाठी आखलेले चौकोन व गोल यामध्ये मजुरांना उभे करून त्यांची नोंद, वैद्यकीय तपासणी व दुबार नोंद करण्यात आली. फलाटावर देखील त्यांना रांगेत उभे करून त्यांच्या आरक्षित डब्ब्यात पाठविण्यात आले. डब्ब्यांमध्ये देखील शारीरिक अंतराचा नियम पाळला जात आहे किंवा नाही, याची रेल्वे सुरक्षा दल व लोहमार्ग पोलिस पडताळणी करीत होते. मजुरांच्या जाण्याची व्यवस्था करणारे व त्यांना निरोप देण्यासाठी आलेले राष्ट्रवादीचे पदाधिकारी मात्र शारीरिक अंतर न पाळता घोळक्‍याने फलाटावर फिरत होते. रेल्वे सुरक्षा दल व लोहमार्ग पोलिस मजुरांना नियम निक्षून सांगत होते, परंतु पदाधिकारी घोळक्‍याने फिरत असताना मौन बाळगून होते. 

उद्धव ठाकरे यांना अमोल कोल्हे म्हणाले, "हे काम कराच...' 

नागरिक एक्‍सप्रेसमध्ये स्थानापन्न झाल्यानंतर तहसीलदार संजय पाटील यांनी या एक्‍सप्रेसला हिरवा झेंडा दाखविला. राष्ट्रवादीचे तालुकाध्यक्ष अप्पासाहेब पवार, महिला आघाडीच्या जिल्हाध्यक्षा वैशाली नागवडे, नगरसेवक बादशहा शेख, मोहन नारंग, युवक आघाडीचे सचिन गायकवाड, सामाजिक आघाडीचे दीपक सोनवणे, आदी पदाधिकारी या वेळी उपस्थित होते. राष्ट्रवादीच्या पदाधिकाऱ्यांनी गर्दी केली, मात्र तेव्हा पोलिस मूक दर्शक बनून राहिले.