दौंडमध्ये कोरोनाने ठोकलाय तळ, आणखी सात पोलिसांसह एका चिमुकलीला बाधा 

दौंड (पुणे) : दौंड शहरात राज्य राखीव पोलिस दलाच्या (एसआरपीएफ) दोन गटांमधील सात पोलिस व शहरातील एका सात वर्षाची मुलगी, अशा एकूण आठ जणांना कोरोना विषाणूची बाधा झाली आहे. गेल्या ४८ दिवसांत पहिल्यांदाच एका सात वर्षाच्या मुलीला कोरोनाची बाधा झाली आहे.

वाहनचालकांनो, तुमच्यासाठी आहे ही महत्त्वाची बातमी

मुंबई येथे बंदोबस्त करून परतलेल्या एसआरपीएफ गट क्रमांक पाच व गट क्रमांक सातमधील पोलिसांचे घशातील स्त्राव तपासणीसाठी पुण्याला पाठविण्यात आले होते. त्यांचा अहवाल आज (ता. १६) आला असून, गट क्रमांक सातमधील सहा व गट क्रमांक पाचमधील एक, अशा एकूण सात पोलिसांना बाधा झाली आहे. या बाधितांचे वयोमान २४ ते ५० दरम्यान आहे, अशी माहिती आज (ता. १६) दौंड उप जिल्हा रूग्णालयाचे अधीक्षक डॅा. संग्राम डांगे यांनी दिली. 

पेट्रोलच्या दरवाढीचा दस का दम

दौंड शहरातील मीरा सोसायटीच्या अलीकडे दत्त मंदिराजवळ दूध विक्रेत्याच्या कुटुंबातील एका ७८ वर्षीय ज्येष्ठ नागरिकास ९ जून रोजी कोरोनाची बाधा झाली आहे. त्यानंतर त्यांच्या संपर्कात आलेल्या तेरा जणांना बाधा झाली होती. आज (ता. १६) त्यांच्या कुटुंबातील एका ७ वर्षाच्या मुलीला बाधा झाल्याने एकाच कुटुंबातील बाधितांची संख्या चौदा झाली आहे.

पुरंदरमध्ये एकाच दिवसात सापडले तीन कोरोनाबाधित

एसआरपीएफ गट क्रमांक सातमधील एकूण ४१ पोलिसांना बाधा झालेली आहे व त्यापैकी २७ जण उपचारानंतर बरे झाले आहेत. गट क्रमांक पाचमधील एकाही पोलिसाला आजपर्यंत बाधा झाली नव्हती, परंतु आज एका ३४ वर्षीय पोलिसाला बाधा झाली आहे. 

पुण्याच्या इतर बातम्या वाचण्यासाठी येथे क्लिक करा

एसआरपीएफचे जवान हे मुंबई येथून परतल्यावर त्यांचे नानवीज (ता. दौंड) येथील राज्य राखीव पोलिस प्रशिक्षण केंद्रात संस्थात्मक विलगीकरण करण्यात आले आहे. बाधित पोलिसांना आज (ता. १६) पुढील उपचारासाठी पुणे येथे रवाना करण्यात आले आहे, अशी माहिती गट क्रमांक पाचचे वैद्यकीय अधिकारी डाॅ. नितीन भोसले यांनी दिली. 

४८ दिवसांत ८९ जणांना बाधा
दौंड शहर व तालुक्यात २९ एप्रिल ते १६ जून या कालावधीत एकूण ८९ जणांना कोरोनाची बाधा झाली आहे. त्यापैकी ५० जण उपचारानंतर बरे झाले आहेत. तर, पाच जणांचा कोरोनामुळे मृत्यू झाला असून, त्यामध्ये दोन महिलांचा समावेश आहे. बाधितांचे वयोमान ०७ ते ८२ या दरम्यान आहे.