भाऊबीजेच्या दिवशी राडा; मानलेल्या बहिणीशी बोलल्याचा जाब विचारल्याने तरुणाचा पाठलाग करून वार

पुणे : भाऊबीजेच्या दिवशी मानलेल्या बहिणीशी बोलल्याचा जाब विचारला म्हणून एका तरुणावर टोळक्‍याकडून कोयत्याने वार करीत, पाठलाग करून जीवे मारण्याचा प्रयत्न झाल्याची धक्कादायक घटना उघडकीस आली आहे. हा प्रकार सोमवारी रात्री साडे दहा वाजण्याच्या सुमारास वारजे येथे घडली. 

याप्रकरणी सागर काळेकर (वय 23, रा. वारजे नाका, वारजे) याने वारजे पोलिस ठाण्यात फिर्याद दिली आहे. त्यावरून नऊ जणांविरुद्ध गुन्हा दाखल करण्यात आला आहे.

पुण्यातील इतर बातम्या वाचण्यासाठी क्लिक करा

पोलिसांनी दिलेल्या माहितीनुसार, फिर्यादी सागर काळेकर याने एका तरुणीला बहिणी मानलेली आहे. दरम्यान, फिर्यादीच्या मानलेल्या बहिणी आरोपी बोलत असल्याचे फिर्यादीच्या निदर्शनास आले होते. त्यामुळे फिर्यादीने आरोपीच्या वाहनाला त्याची दुचाकी आडवी लावून "तू माझ्या बहिणीबरोबर काय बोलत होतास' असा जाब विचारला होता.
 

आरोपीने या घटनेचा राग मनात धरून त्याच्या साथीदारांना बोलावून घेतले आणि त्यानंतर सोमवारी रात्री साडे दहा वाजण्याच्या सुमारास आरोपी व त्याचे आठ साथीदार फिर्यादी राहात असलेल्या वारजे येथील आचार्य सोसायटीमध्ये आले. त्यांनी फिर्यादीस गाठून त्याच्यावर कोयत्याने वार केला, मात्र फिर्यादीने कोयत्याचा वार चुकवून तो खाली वाकला. त्यामुळे कोयत्याचा वार तेथील लोखंडी बाकड्यावर बसला. त्यानंतर फिर्यादी तेथून पळून जाऊ लागले, त्यावेळी आरोपींनी त्यांचा पाठलाग करीत, "आज याला सोडायचा नाही, खल्लास करून टाका याला' अशी धमकी देत जोरजोरात शिवीगाळ व आरडाओरडा करीत परिसरामध्ये दहशत निर्माण केली. या प्रकारामुळे भाऊबीजेसाठी परिसरात आलेल्या नागरिकांमध्ये मोठ्या प्रमाणात भीतीचे वातावरण निर्माण झाले.

हे वाचा - दिवाळीत घरफोड्या करणाऱ्या चोरट्यांना अटक; 29 लाख रुपयांचा मुद्देमाल जप्त

फिर्यादीच्या नातेवाइकांसह स्थानिक नागरिकांनी भीतीपोटी घराचे दरवाजे बंद करून घेतले. आरोपींनी तेथून जाताना फिर्यादी यांच्या चुलत्याच्या दुचाकीच्या टाकीवर कोयत्याचे वार करून दुचाकीचे नुकसान केले. त्यामध्ये दुचाकीचे पाच हजार रुपयांचे नुकसान झाले. या प्रकरणाचा तपास पोलिस उपनिरीक्षक गायकवाड करीत आहेत.