देहूरोड येथे गोळ्या झाडून तरुणाचा खून

पिंपरी, ता. २८ : अज्ञात व्यक्तींनी केलेल्या गोळीबारात तरुणाचा मृत्यू झाला. ही घटना देहूरोड येथे मंगळवारी रात्री नऊच्या सुमारास घडली. ‘‘या प्रकरणातील आरोपींना तत्काळ अटक करावी,’’ या मागणीसाठी मृताच्या नातेवाईकांनी सुमारे पाऊण तास जुना पुणे-मुंबई महामार्ग रोखून धरला.
रमेश गुरुस्वामी रेड्डी (वय ४०, रा. गांधीनगर, देहूरोड) असे खून झालेल्या व्यक्तीचे नाव आहे. याबाबत पोलिसांनी दिलेल्या माहितीनुसार, ‘‘
रमेश हे देहूरोड बाजारपेठेतील नेहरू मंगल कार्यालयाजवळ असताना हल्लेखोरांनी गोळीबार केला. यात रमेश गंभीर जखमी झाले. स्थानिक व्यक्तींनी त्यांना खासगी रुग्णालयात दाखल केले. मात्र, उपचारांपूर्वीच त्यांचा मृत्यू झाला, असे डॉक्टरांनी सांगितले.’’
या प्रकरणी गुन्हा दाखल करण्याची कार्यवाही देहूरोड पोलिस ठाण्यात रात्री उशिरापर्यंत सुरू होती. दरम्यान, रमेश यांचे भाऊ विक्रम रेड्डी यांचाही फेब्रुवारी-२०२५ मध्ये गोळ्या झाडून खून करण्यात आला होता.

PNE26W15668