आळंदी : शिक्षण प्रशासन अधिकाऱ्यांचे कार्यालय खाली करून त्याठिकाणी अंगणवाडी सुरू केली जात आहे. मात्र त्यासाठी शिक्षण प्रशासन अधिका-यांचे कार्यालय बंद केले जात आहे. पर्यायी व्यवस्था म्हणून शिक्षण विभागाचे कामकाज पालिकेतच करावे यासाठी पालिका कार्यालयात स्वतंत्र व्यवस्था केली. मात्र शिक्षण विभागाकडून कार्यालय हलविण्यास स्पष्ट नकार दिल्याने शिक्षण विभाग आणि पालिका कार्यालय यांच्यात सध्या कलगीतुरा सुरू आहे.
गेल्या दोन वर्षांपासून नगरसेवक आणि शिक्षण प्रशासन अधिकारी यांच्यात कार्यालय हलविण्यावरून वितंड होत आहे. नगराध्यक्ष वैजयंता उमरगेकर आणि काही नगरसेवकांनी पालिकेच्या शिक्षण विभागाचे कार्यालय पालिका कार्यालयात हलविण्याची मागणी मुख्याधिका-यांकडे केली.
शिक्षण विभागातील कामकाज आणि शिक्षकांवर अंकूश रहावा यासाठी लोकप्रतिनिधींचा मानस होता. त्यानुसार मुख्याधिकारी अंकूश जाधव यांनी शिक्षण प्रशासन अधिकारी सुजाता देशमाने यांना सप्टेंबर महिन्यात पत्रव्यवहारही केला. पालिकेच्यावतीने चावडी चौकातील शाळेत अंगणवाडी सरू करायचे असून, त्यासाठी कार्यालय खाली करावे आणि कर्मचा-यांसह पालिका कार्यालयात व्यवस्था केली असल्याचे पत्र मुख्याधिकारी जाधव यांनी शिक्षण प्रशासन अधिकारी देशमाने यांना दिले. मात्र देशमाने यांनी या पत्राला दाद दिली नाही.
शिक्षण प्रशासन अधिकारी देशमाने यांनी उलट पत्रव्यवहार करून मुख्याधिकारी यांना आपण राजकिय दबाव टाकून शिक्षण विभागाचे कार्यालय नियमबाह्य स्थानांतरित करत आहात. राज्य शासनाच्या शालेय शिक्षण विभागाच्या अंतर्गत आमचे कार्यालय येते. यामुळे वरिष्टांच्या आदेशाशिवाय कार्यालय हलविता येणार नाही. पालिकेच्या कारवाईचा प्रश्नच नाही असे उत्तर दिले.
शिक्षण प्रशासन अधिकारी, नगरसेवक आणि मुख्याधिकारी यांच्यात शिक्षण प्रशासन अधिकारी यांचे कार्यालय हलविण्यावरून मतभेद असून एकमेकांवर कुरघोडी केली जात आहे. पालिकेच्या चार शाळा आहेत. शाळांचे शिक्षकांची हजेरी बायोमेट्रिक पद्धतीने व्हावी,शालेय पोषण आहारातील तांदूळ वाटप,तसेच पालिकेच्या विविध कामकाजात राज्य शासनाच्या आदेशानुसार शिक्षकांची मदत व्हावी हा उद्देश होता. तसेच सर्व कार्यालय एकाच छताखाली येतील या उद्देशाने शिक्षण विभागाचे कार्यालय पालिकेत आणण्यात येणार होते. आता विविध कारणे सांगून शिक्षण विभागाने कार्यालय हलविण्यास नकार दिल्याने मुख्याधिकारी काय कारवाई करतात याकडे लक्ष लागले आहे.
(संपादन : सागर डी. शेलार)
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.